«Հայաստան» դաշինքի անդամ Իշխան Սաղաթելյանն անդրադարձել է Նիկոլ Փաշինյանի այսօրվա հիստերիկ դրսևորումներին ու դրա համար առիթ դարձած տեսանյութին, որում դիմակավորված 4 անձ Արցախի բարբառով սպառնում են Փաշինյանին։
«Փաշինյանը առավոտից մի ինչ-որ տեսանյութի է հղում անում, որը վստահաբար ինքն է պատրաստվել, որ իբր մի խումբ արցախցիներ դիմակներով սպառնում են Փաշինյանին վերացնելու կամ վրեժ լուծելու համար; Այս տեսանյութը վերցրել է, ընկել է փողոցները, սրան հղում անելով՝ աջ ու ձախ սպառնալիքներ է հնչեցնում և ընդդիմությանը մեղադրում այս քայլերի հետ կապ ունենալու կամ պատվիրելու համար։
Ժողովուրդ ջան, այս մարդու մոտ բան չի փոխվել, այս նույն ձեռագիրն է ու արդեն վաղուց վառված ձեռագիրը, նույնն այս մարդը արել է պատերազմից հետո, Դիմադրության շարժման ժամանակ, Սրբազան շարժման ժամանակ, այսինքն, հենց նեղ է ընկնում՝ ինքն իր դեմ ահաբեկչության, սպանության փորձի բեմադրություն է կազմակերպում, մի նպատակով, որպեսզի նախ վախ սերմանի ժողովրդի մեջ և դրանով արդարացնի ընդդիմության նկատմամբ իր ապօրինի քայլերը, բռնությունները և ձերբակալությունները, առհասարակ երկրի սահմանադրական կարգի տապալումը։
Լսի Նիկոլ, դու մեր ժողովրդին պետք ես ողջ և առողջ, մենք ամեն ինչ անելու ենք քո անվտանգությունը ապահովելու համար, որովհետև դու պետք ես կենդանի մեր ժողովրդին։ Դու դեռ դատարաններում պիտի պատմես՝ ինչո՞ւ հանձնեցիր Արցախը, ինչո՞ւ շուրջ 5000 մարդու մահվան պատճառ դարձար, ովքեր են քո մեղսակիցները։ Այս դավաճանությունը ու այս ամեն ինչը մեր ժողովրդի պետության գլխին ինչու արեցիր»։
