«Ժողովուրդ» օրաթերթը գրում է. «2026 թվականի մարտի 29-ին Նիկոլ Փաշինյանի՝ թիմակիցների հետ Սուրբ Աննա եկեղեցի կատարած այցը, որն ուղեկցվեց միջադեպով և մինչ օրս վարչական հսկողության տակ է։ «Ժողովուրդ» օրաթերթը պարզեց, որ ՊՊԾ-ում ծառայողական քննություն է սկսվել։
Հիշեցնենք, որ երբ Նիկոլ Փաշինյանը թիկնազորի ուղեկցությամբ մտել էր Ս. Աննա եկեղեցի՝ Ծաղկազարդի պատարագի ժամանակ, անվտանգության աշխատակիցները փորձել են սահմանափակել հավատացյալների տեղաշարժը՝ պահանջելով հետ քաշվել։ Սա դժգոհություն էր առաջացրել մի խումբ երիտասարդների շրջանում, ինչի արդյունքում առաջացել էր հրմշտոց անվտանգության ծառայողների և քաղաքացիների միջև։
Դեպքից հետո եկեղեցու բակում ձերբակալվել էին երեք երիտասարդներ՝ 18-ամյա եղբայրներ Դավիթ Մինասյան և Միքայել Մինասյան, ինչպես նաև Գևորգ Գևորգյանը։ Վերջինս հայտարարել է, որ իրեն բերման են ենթարկել վարչապետի «աչքերի մեջ նայելու» համար։
Հետագայում հրապարակվեց տեսանյութ, որտեղ երևում է, թե ինչպես է վարչապետի անվտանգության աշխատակիցներից մեկը հարվածում երիտասարդին հենց եկեղեցու տարածքում։ Տեսանյութը կասկածի տակ է դնում այն վարկածը, թե երիտասարդը հարձակման մտադրություն է ունեցել։
Այս էմոցիոնալ ու իրավական գործընթացներից հետո հասարակական քննարկումների կենտրոնում է հայտնվել նաև անվտանգության աշխատակիցներից մեկը՝ Արտյուշ անունով ծառայողը, որի գործողությունները քննության առարկա են դարձել։ Ըստ «Ժողովուրդ» օրաթերթի բացառիկ տեղեկությունների՝ ՊՊԾ համակարգում նշանակվել է ծառայողական քննություն՝ միջադեպի հանգամանքները պարզելու նպատակով։ Նույն օպերատիվ աղբյուրների փոխանցմամբ՝ քննության ընթացքում որոշում է կայացվել, որ տվյալ աշխատակիցը ժամանակավորապես ներկա չի գտնվի հանրային միջոցառումներին՝ հաշվի առնելով միջադեպի շուրջ ձևավորված հանրային արձագանքը։ Նա բացասական արձագանք է առաջացնում»։
