Այս ընտրությունները ճակատագրական նշանակություն ունեցող ընտրություններ են լինելու։ Այս մասին այսօր՝ ապրիլի 18-ին, Վանաձորում բնակիչների հետ հանդիպման ընթացում հայտարարեց «Հայաստան» խմբակցության պատգամավոր Աննա Գրիգորյանը։
«Ես իսկապես չեմ հիշում մեր պատմության որևէ ընտրական փուլ, որտեղ խաղադրույքը այսքան բարձր լինի, որտեղ իսկապես մեր պետականության հարցը քննարկման առարկա դարձած լինի, որտեղ իսկապես մեր հայկական ինքնության պահպանման քննարկումներ գնան, Արարատի մասին քննարկում գնա, Արարատին նայել-չնայելու մասին քննարկում լինի, մենք իսկապես որևէ շրջափուլում ընտրական, ընտրական որևէ գործընթացի ժամանակ նման հարցեր չենք քննարկել, բայց ցավոք այսօր հասել ենք մի հանգրվանի, որտեղ ինքնությունն է հարցականի տակ դրված, մեր պատմության վերանայումն է հարցականի տակ դրված։ Հետևաբար, իսկապես, իրավացիորեն ասում ենք, որ սա ճակատագրական ընտրություններ են։
Դուք գիտեք, որ վերջերս բավականին հաճախ մի կուսակցություն, որ ամենաշատ պատերազմն է բերել մեր ժողովրդին, խոսում է, որ եթե հանկարծ իրենք չընտրվեն, կարող է պատերազմ լինի: Պատերազմի միագլուխ կուսակցություն ՔՊ-ն համարձակվում է որևէ այլ ուժի մեղադրել պատերազմ լինելու մեջ, ինչը ուղղակի եզակի ցինիզմ է, հատկապես մեր ուժին, ում առաջնորդի ժամանակահատվածում, պարոն նախագահի առաջնորդության ժամանակահատվածում ընդհանրապես պատերազմներ չեն եղել»,- նշեց նա։
Մանրամասն՝ տեսանյութում։
