Հայաստանի քաղաքական պատմության մեջ կա մի վատ ավանդույթ. ընտրություններից հետո նախընտրական դաշինքները սովորաբար փլուզվում են, մարդիկ հեռանում են, իսկ միավորող գաղափարները՝ մոռացվում։ Բայց նայե՛ք այս դահլիճին. մենք այսօր ավելի ամուր ենք,պինդ և պատրաստ նոր պայքարի։ Այս մասին այսօր՝ մարտի 16-ին, «Հայաստան» դաշինքի հանդիսավոր միջոցառման ընթացքում ասաց ԱԺ պատգամավոր Իշխան Սաղաթելյանը։
«Չնայած հարվածներին, քաղաքական հալածանքներին, աննախադեպ ճնշումներին՝ «Հայաստան» դաշինքը ոչ միայն մնաց կենսունակ, այլև այսօր ներկայանում է նորացված ու ընդլայնված կազմով։
Այսօր պատիվ ունեմ պաշտոնապես հայտնելու. Հայաստանի երկրորդ նախագահը Ռոբերտ Քոչարյանը և Հայ Յեղափոխական Դաշնակցությունը շարունակում են համագործակցությունը։ Մեզ է միացել «ԱռԱջ» կուսակցությունը, նաև հանրային ու քաղաքական բազմաթիվ գործիչներ։ Առաջիկա խորհրդարանական ընտրություններին մենք մասնակցելու ենք միասնաբար՝ «Հայաստան» Դաշինքով ։
Սա սոսկ նախընտրական միավորում չէ։ Անձի կամ անձերի շուրջ համախմբվելու փորձ չէ։ Սա Հայաստանի ճակատագրով մտահոգ ուժերի և մարդկանց ՝ջանքերի մեկտեղումն է՝ հայկական ինքնությունը պահելու, մրցունակ և անվտանգ Հայաստան վերակերտելու նպատակով։
Անցնող ժամանակը մեզ համար չի եղել պարզապես քաղաքականությամբ զբաղվելու կամ պատգամավոր աշխատելու տարիներ։ Դրանք պայքարի և գոյության կռվի տարիներ էին։ Մենք չենք լռել, չենք հաշտվել, չենք նահանջել, չենք համակերպվել, չենք թաքնվել, մենք դեմ առ դեմ կռիվ ենք տվել և փողոցում, և խորհրդարանում և միջազգային հարթակներում»,- ասաց նա:
Մանրամասն՝ տեսանյութում։
