Մենք հիմա շատ ենք խոսում հաղորդակցության ապաշրջափակման մասին, բայց մենք շատ լավ հասկանում ենք, թե ինչ է դրա հետևում կանգնած և ինչ գին պետք է վճարի Հայաստանն ու ողջ հայությունը, և գինը բնավ համարժեք չէ այն չակերտավոր հնարավոր օգուտներին, որոնք կարող է ստանալ Հայաստանը։ Այս մասին «Իրավիճակն Իրանում և Հարավային Կովկասի երկրները» տեսակամուրջի ընթացքում հայտարարեց ռուսաստանցի քաղաքագետ, միջազգային մեկնաբան Մովսես Ղազարյանը։
«Այս առումով Իրանի Իսլամական Հանրապետության հետ փոխգործակցության առկայությունը ներկա իրավիճակում և, ընդհանուր առմամբ, և՛ միջնաժամկետ, և՛ երկարաժամկետ հեռանկարում, դա այն է, ինչը Հայաստանին աշխարհաքաղաքական տարածք կտա մանևրելու, նրա անկախությունն ու ուժը պահպանելու համար: Եվ ի վերջո, իսկապես, Իրանի Իսլամական Հանրապետությունը, եկեք նույնիսկ հիշենք 44-օրյա պատերազմի սկիզբը, ամենևին էլ չի ողջունել Արցախի խաղաղ բնակչության նկատմամբ ադրբեջանական ագրեսիան։ Իրանի Իսլամական Հանրապետությունը բոլորովին չի ողջունում թուրքական և ադրբեջանական նկրտումները Սյունիքի և հայկական այլ պատմական տարածքների նկատմամբ: Եվ ընդհանուր առմամբ, Իսլամական Հանրապետությունն, այնուամենայնիվ, Թուրքիայի մրցակիցն է տարածաշրջանում»,- ասաց նա։
Մանրամասն՝ տեսանյութում։
