ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը. «Սա Ամարասի վանքն է, որը գտնվում է Արցախի Հանրապետության Մարտունու շրջանի Մաճկալաշեն գյուղի մոտ: Ամարասը հայկական պետականության, ազգային ինքնության և Արցախում մեր պատմական ներկայության անքակտելի մասն է։
Վանական համալիրն այժմ ժամանակավորապես օկուպացված է Ադրբեջանի կողմից։ Այս ողբերգական իրողության ամենամեծ «ներդրումն» ունեցել են հենց նրանք, ովքեր այսօր հանդես են գալիս որպես իբր Հայաստանյաց Առաքելական Սուրբ Եկեղեցու պաշտպաններ ու «բարենորոգիչներ»։ Նրանք, ովքեր իրենց քաղաքական ձախողումներն ու պարտությունները փորձում են քողարկել կեղծ բարեպաշտությամբ՝ վարչապետ կոչեցյալի գլխավորությամբ։
Եկեղեցիները չեն պաշտպանում դատարկ քարոզչությամբ կամ կեղծ բարեպաշտությամբ։
Եկեղեցիները պաշտպանվում են ուժեղ պետությամբ, հաշվարկված արտաքին քաղաքականությամբ, ազգային արժանապատվություն ունեցող իշխանությամբ և պատասխանատվության գիտակցմամբ։
Եվ վերջում. պարոնայք իբր բարենորոգիչներ, նախ կարողացեք վերադարձնել գեթ մեկ եկեղեցի Ադրբեջանի օկուպացիայից, գեթ մեկ սրբավայր վերականգնել հայկական վերահսկողության ներքո։ Միայն դրանից հետո կարող եք խոսել բարենորոգումների մասին։
Մինչ այդ ձեր «բարենորոգումները» զրկված են թե’ հոգևոր, թե՛ քաղաքական և թե՛ բարոյական լեգիտիմությունից»։
