ԱԺ-ում ՀՀ պաշտպանության նախարարը խոսել է բանակի, այսպես ասած, բարեփոխումների մասին: Ըստ նրա՝ բանակի ամենաարժեքավոր կապիտալը նրա մարդկային ռեսուրսն է:
«Ես համոզմունք ունեմ, որ յուրաքանչյուր պետության պաշտպանունակության գրավականն ու աքիլեսյան գարշապարը պահեստազոր-թիկունքային ապահովում-բանակ գործունակ համակարգի գոյությունն ու բացակայությունն է»,- ընդգծել է նա։
Նախարարն ասել է, որ շարունակվում է բանակային դիրքերի կահավորումը նոր ու գերժամանակակից սարքավորումներով, ինչը բարձրացնում է պետական սահմանի պաշտպանվածության մակարդակը։
Սուրեն Պապիկյանը նշել է, որ ռազմատեխնիկական կապերի ընդլայնումն ու սպառազինության դիվերսիֆիկացիան Հայաստանի անվտագային ճարտարապետության գլխավոր ուղղություններից են ու հենց այս տրամաբանությամբ էլ շարունակվում են զինված ուժերի արդիականացմանն ուղված աշխատանքները։
«Մեր ուշադրության կենտրոնում է նաև տեղական ռազմարդյունաբերությունը, 2022-ին ունեցել ենք տեղական ռազմարդյունաբերական ընկերությունների հետ մոտ 5.5 միլիարդ դրամի պայմանագիր, հետագայում եռամյա պայմանագրերի արդյունքում այդ թիվն այսօր դարձել է 171 միլիարդ դրամ»,- նշեց նա։
Պաշտպանության նախարարն ընդգծել է՝ Հայաստանն իր սպառազինությունն ու բանակն օգտագործելու է մեկ նպատակով՝ ՀՀ տարածքային ամբողջականությունն ու ինքնիշխանությունը պաշտպանելու համար։
