Փարիզում ԱՄՆ դեսպան Չարլզ Քուշները երկուշաբթի կանչվել է Ֆրանսիայի արտաքին գործերի նախարարություն, այն բանից հետո, երբ նա նամակ էր գրել նախագահ Մակրոնին՝ քննադատելով Ֆրանսիայի կառավարությանը՝ հակասեմականության աճի դեմ պայքարելու հարցում անբավարար ջանքերի համար: Այս մասին, BBC-ի փոխանցմամբ, հայտարարություն է տարածել Ֆրանսիայի ԱԳՆ-ն՝ անընդունելի համարելով դեսպանի դիտողությունները։
Ազգությամբ հրեա Չարլզ Քուշները, որի որդին՝ Ջարեդը, ամուսնացած է ԱՄՆ նախագահ Դոնալդ Թրամփի դստեր՝ Իվանկայի հետ, բաց նամակ էր գրել նախագահ Մակրոնին՝ մտահոգություն հայտնելով Ֆրանսիայում հակասեմականության աճի և «դրա դեմ պայքարելու համար կառավարության կողմից բավարար գործողությունների բացակայության» վերաբերյալ: Քուշները նշել է, որ հրեաների նկատմամբ ատելությունը Ֆրանսիայում աճում է Գազայի պատերազմից ի վեր։
Wall Street Journal-ում հրապարակված նամակում դեսպանը նախագահ Մակրոնին կոչ էր արել մեղմացնել Իսրայելի նկատմամբ իր քննադատությունը և մեջբերել հակասեմականության օրինակներ, որոնք, նրա խոսքով, «երկար ժամանակ խաթարել են ֆրանսիական կյանքը»: Դիվանագետը պնդում է, որ Ֆրանսիայում ոչ մի օր չի անցնում՝ առանց հրեաների դեմ հալածանքների։
