Կոտայքի մարզում գործող «Նոր Գեղիի ակադեմիկոս Գ. Աղաջանյանի անվան պետական գյուղատնտեսական քոլեջ» և «Բյուրեղավանի արհեստագործական պետական ուսումնարան» ՊՈԱԿ-ները միաձուլվում են՝ դառնալով «Նոր Գեղիի բազմագործառութային պետական քոլեջ» ՊՈԱԿ:
Հիմնավորման մեջ գրված է, որ Նոր Գեղի գյուղի Ուսանողական 5 հասցեում գործող քոլեջում սովորում է 247 ուսանող՝ հետևյալ 7 մասնագիտություններով` «Փոխադրումների կազմակերպում և կառավարում տրանսպորտում (ըստ տրանսպորտի տեսակների)», «Մեղվաբուծություն», «Ջերմատնային տնտեսություն», «Գյուղատնտեսության մեքենայացում», «Գյուղատնտեսագիտություն», «Բուսաբուծական արտադրանքի պահպանում և վերամշակում» և « Վայրի բույսերի վերարտադրություն, հավաքագրում և մթերում», իսկ Բյուրեղավանի Կոտայքի փողոց 60/2 հասցեում գործող ուսումնարանում սովորում է 176 ուսանող՝ հետևյալ 8 մասնագիտություններով` «Տրանսպորտային միջոցների շահագործում և նորոգում», «Վարսավիրական արվեստ և զարդային դիմահարդարում», «Համակարգիչների շահագործում», «Խոհարարական գործ», «Ապակու արտադրության տեխնոլոգիա», «Հաշվապահություն» և «Կարի արտադրության տեխնոլոգիա»:
Ուսումնարանի տարածքը մեծ է, լիարժեք չի օգտագործվում, սակայն գումար է ծախսվում տարածքի պահպանման համար։ Ուսումնարանը հիմնանորոգված չէ իսկ Նոր Գեղիի քոլեջը հիմնանորոգվում է։
Նախատեսվում է 2026-27 ուստարում արդեն միաձուլված աշխատել։
Կառավարությւոնը նշում է, որ այս միաձուլման արդյունքում կբարձրանա ուսումնական հաստատության կառավարման արդյունավետությունը, կբարելավվեն շենքային պայմանները, կապահովվի անհրաժեշտ նյութատեխնիկական բազայով, կպահպանվեն ուսուցանվող մասնագիտությունները և կներդնվեն արդի աշխատաշուկայի պահանջներից ելնելով նոր մասնագիտություններ:
