Հայաստանի և ԵՄ-ի միջև վիզային ռեժիմի ազատականացումը կարող է 4-5 տարի տևել, լրագրողներին ասել է ՆԳՆ միգրացիայի և քաղաքացիության ծառայության ղեկավար Նելլի Դավթյանը:
Նրա խոսքով, հունիսին Հայաստանին կներկայացվի գործողությունների ծրագիր, որից հետո Հայաստանը տարեկան զեկույց է ներկայացնելու, թե ուր է հասել։
«Կենսաչափական անձնագրերի ներդրումը վիզաների ազատականացման համատեքստում ուղիղ և պարտադիր դրված պահանջ է։ Բոլոր այն պետությունները, որոնք վիզաներ են ազատականացրել ԵՄ հետ, պարտադիր կերպով հիմքում ունեցել են այս պահանջը»,- նշեց Դավթյանը։
Նա նաև նշեց, որ կենսաչափական համակարգի ներդրումը Հայաստանին ներկայացվելիք պահանջների մի կարևոր բաղադրիչն է, բայց ոչ միակը և հնարավոր չէ միայն դրանով պայմանավորել վիզաների ազատականացումը։
