Կառավարությունն այսօրվա՝ սեպտեմբերի 3-ի նիստում հավանություն տվեց Հայաստանը հերթական վարկի տակ գցելու նախագծին։
Հայաստանի Հանրապետության և ՕՊԵԿ-ի միջազգային զարգացման հիմնադրամի միջև 2026թ․ հուլիսի 8-ին և 16-ին ստորագրվել է «Հայաստանի տնտեսական վերափոխման ծրագիր» վարկային համաձայնագիրը՝ 80 մլն եվրո արժողությամբ, որը նպատակաուղղված է ՀՀ-ում մրցակցային միջավայրի բարելավմանը և ներդրումների ներգրավմանը:
Բյուջետային աջակցության միջոցների ստացման համար նախապայման է հանդիսանում մի շարք ոլորտներում միջոցառումների և բարեփոխումների իրականացումը: Բարեփոխումների շրջանակը ներառում է՝
- Ներդրումների և առևտրի ազատականացումը և մրցակցության խրախուսումը
- Ավելի կանաչ և ավելի դիմակայուն աճի ապահովումը
- Վարկի տարեկան տոկոսադրույք՝ լողացող, 6-ամսյա EURIBOR + 1.56%, 30.07.2026թ. դրությամբ կազմում է 4.241% (2.681%+1.56%)։
- վարկի մարման ժամկետ՝ 18 տարի, որից արտոնյալը՝ 5 տարի,
- պարտավորության վճար՝ տարեկան 0.25% դրույքաչափ, հաշվարկվում է վարկի չմասհանված գումարի նկատմամբ Համաձայնագրի ստորագրումից 60 օր հետո և վճարվում է Համաձայնագրի ուժի մեջ մտնելուց 90 օրվա ընթացքում,
- միանվագ կոմիսիոն վճար՝ վարկի գումարի 0.25%-ի չափով, որը պետք է վճարվի ոչ ուշ քան Համաձայնագրի ուժի մեջ մտնելուց 90 օրվա ընթացքում,
- վարկի սպասարկման գծով վճարումները կատարվելու են կիսամյակային կտրվածքով` յուրաքանչյուր տարվա հունվարի 15-ին և հուլիսի 15-ին,
- մայր գումարի մարումն իրականացվելու է 2031թ. հուլիսի 15-ից մինչև 2044թ. հունվարի 15-ը,
- վարկային միջոցների օգտագործման վերջնաժամկետ 2026թ. սեպտեմբերի 30-ը:
Վարկը վերցվում է 2026թ․ պետբյուջեի պակասուրդի փակման համար:
