«Մենք հատուկ ձևով գնալու ենք այդ լուծումներին: Պետությունը բոլոր լծակները օգտագործելու է, որ Կտրիճ Ներսիսյանը հեռանա»,- այսօր՝ հոկտեմբերի 1-ին ճեպազրույցում հայտարարեց Նիկոլ Փաշինյանը՝ Ամենայն Հայոց կաթողիկոսի մասին օգտագործելով վիրավորական ձևակերպումներ։ Նա նաև հայտարարեց, որ մտադիր է հետամուտ լինել Հայ Առաքելական եկեղեցու և պետության հարաբերությունները կարգավորող օրենսդրական փոփոխություններին։
Կառավարության ղեկավարին բազմիցս հիշեցրել են, որ եկեղեցին անջատ է պետությունից, և նա խախտում է ՀՀ սահմանադրությունը՝ խառնվելով եկեղեցու գործերին։
Բայց ուշագրավ է, որ հենց Նիկոլ Փաշինյանը ժամանակին բազմիցս խոսել է Հայ Առաքելական Սուրբ Եկղեցու անկախության մասին։
Հիշենք նրա՝ ավելի վաղ արած հայտարարություններից մի քանիսը․
2018 թվականի հունիսի 13-ին «Նոր Հայաստան, նոր Հայրապետ» նախաձեռնության մասին հարցին Փաշինյանը պատասխանել է. «ՀՀ-ում եկեղեցին և պետությունը անջատ են, և ես՝ որպես պետության ներկայացուցիչ, պետության ղեկավար, իրավունք չունեմ միջամտել եկեղեցու գործերին որևէ կերպ։ Սա իմ պաշտոնական և պաշտոնեական դիրքորոշումն է»։
2024 թվականի մայիսի 7-ին Փաշինյանը մամուլի ասուլիսի ժամանակ հայտարարել է․ «Կառավարությունը չպետք է միջամատի եկեղեցու գործերին։ Հայ Առաքելական եկեղեցին ունի գործունեության իր կանոնները, իր կանոնակարգը»։
Նույն ասուլիսում Փաշինյանն ասել է, որ ինքը կարող է կարծիք հայտնել որպես անհատ, սակայն. «Իմ կարծիքը մեծ հաշվով հետևանք չունեցող կարծիք է»։ Եվ կրկին շեշտել է. «Կառավարությունը չպետք է եկեղեցու գործերին միջամտի»։
2025-ի հունվարի 24-ին Շվեյցարիայի հայ համայնքի հետ հանդիպման ընթացքում Փաշինյանն արդեն երկու ուղղությամբ էր սահմանում տարանջատումը. «Պետությունը պետք է չխառնվի եկեղեցու գործերի մեջ, եկեղեցին էլ՝ պետության գործերի մեջ»։
2026թ․ հունվարի 29-ին Կաթողիկոսի տեղապահի հնարավոր նշանակման մասին հարցին Փաշինյանը պատասխանել է. «Պատասխանատու կերպով ասում եմ, որ դա իմ որոշումը չի կարող լինել։ Դա պետք է եպիսկոպոսաց դասի որոշումը լինի։ Եթե ինձանից կարծիք հարցնեն այդ հարցի շուրջ, ես կարծիք կարտահայտեմ, եթե չհարցնեն, ապա չեմ արտահայտի։ Եթե ես … կարծիք արտահայտեմ, ապա կստացվի, որ ես խախտում եմ եկեղեցու գործերին չմիջամտելու սկզբունքը»։
Ապրիլի 21-ին ՔՊ-ի նախընտրական ծրագրի ներկայացման ժամանակ Փաշինյանը ասել է. «Եկեղեցին անջատ է պետությունից» և հատուկ ընդգծել է. «Ես դրա լիարժեք կողմնակիցն եմ»։
Ըստ երևույթին, տեսնելով, որ չի կարողանում հասնել Կաթողիկոսի հեռացմանը, որի փորձերը քանիցս արվել է, այդ թվում՝ եկեղեցու ներքին պառակտման ճանապարհով, Փաշինյանը որդեգրել է արդեն այլ սկզբունք՝ եկեղեցու հետ վարվել որպես կատավարությանը կից մարմնի և կառավարության նիստում ու ԱԺ-ում որոշել եկեղեցական հարցերը։
Կրկին հիշեցնենք, որ եկեղեցու դեմ փաշինյանական գրոհները մեկնարկել են Ադրբեջանի կոչից հետո։
