Պուտինի այցը Հայաստան այս տարի քիչ հավանական է․ ՌԴ նախագահի օգնական

ՌԴ նախագահ Վլադիմիր Պուտինի այցը Հայաստան քննարկվել է, սակայն մինչև տարեվերջ քիչ հավանական է, պետք է կենտրոնանալ 2019 թվականի վրա։ Այս մասին հայտնել է ՌԴ նախագահի օգնական Յուրի Ուշակովը, գրում  է РИА Новости-ն։

«Նկատի է առնվել, որ նախագահները դեռ կհանդիպեն ոչ միայն Դուշանբեում՝ ԱՊՀ գագաթնաժողովին, այլև Աստանայում ՀԱՊԿ նստաշրջանին։ Դա մեկ, և դեկտեմբերին Մոսկվայում նախատեսվում է Եվրասիական տնտեսական միության գագաթնաժողով, որը նույնպես հնարավորություն է տալիս առաջնորդներին մտքեր փոխանակել, ծայրահեղ դեպքում՝ կարճ։ Այցի կամ ինչ–որ ժամկետների մասին հարց դեռևս չի քննարկվել։ Կարծում եմ՝  այցի մասով տեղին կլինի աշխատել հաջորդ տարվա համար»,-նշել է նա։

Ուշակովը հիշեցրել է՝ ՌԴ նախագահի և ՀՀ վարչապետի վերջին հանդիպումը բոլորովին վերջերս է կայացել. «Այս տարի նրանք արդեն 3 անգամ հանդիպել են, բավականին հիմնավոր քննարկումներ են ունեցել։ Մասնավորապես, վերջին անգամ նախագահը և վարչապետը երկուսով շուրջ երեք ժամ քննարկում են ունեցել, իսկապես լավ և հիմնավոր խոսել են»,- հավելել է նախագահի օգնականը։