Ժամանակակից քաղաքականության մեջ պոպուլիզմն ավելի ու ավելի է կառուցվում ցուցադրականության, վառ հակամարտությունների և աղմկահարույց հայտարարությունների վրա, մինչդեռ պետական կառավարման փորձը մղվում է երկրորդ պլան։ Այս մասին հայտարարել է ՌԴ ԱԳՆ Մոսկվայի միջազգային հարաբերությունների պետական ինստիտուտի (ՄՄՀՊԻ) միջազգային լրագրության ֆակուլտետի պրոֆեսոր, քաղաքական գիտությունների դոկտոր Վիկտոր Սողոմոնյանը՝ «За рубежом» նախագծում՝ անդրադառնալով ժամանակակից մեդիայի ազդեցությանը քաղաքական առաջնորդների վրա։
«Միևնույն ժամանակ, երբ ամբողջ աշխարհում մարդկային հասարակության մեդիումը փոխվեց, այսինքն՝ տպագիր գրքից անցում կատարեցինք դեպի էկրան, էկրանն սկսեց թելադրել իր պայմանները։ Էկրանն ունի երկու կարևորագույն առանձնահատկություն․ առաջինը՝ տեսարժանությունը, երկրորդը՝ սյուժետայնությունը», — նշել է Սողոմոնյանը։
Նրա խոսքով՝ ժամանակակից պոպուլիստներն իրենց ժողովրդականությունը կառուցում են վառ կերպարների, հստակ մատնանշված թշնամու հետ հակադրության և հասարակությանը կորցրած բարեկեցությունը վերադարձնելու խոստումների վրա։
«Աշխարհում պոպուլիստների ճնշող մեծամասնությունը՝ լինի ԱՄՆ-ում, Լատինական Ամերիկայում, թե Եվրոպայում, օգտագործում է մեկ հիմնական առասպել՝ կորուսյալ դրախտի առասպելը։ Նրանց ողջ խոսույթը հանգում է հետևյալին․ նախկինում մենք դրախտ ունեինք, այն մեզանից գողացել են, և դրա համար այսօր ապրում ենք աղքատության մեջ։ Ահա ես կվերադարձնեմ ձեզ այդ դրախտը»,- պարզաբանել է նա։
Սողոմոնյանը նաև կարծիք է հայտնել, որ նման քաղաքական մոդելը բացասաբար է անդրադառնում պետական կառավարման որակի վրա։
Մանրամասները՝ տեսանյութում։
