Ուկրաինայի նախագահ Վլադիմիր Զելենսկին երեքշաբթի օրը, «Մեծ յոթնյակի» (G7) գագաթնաժողովի շրջանակում, հանդիպել է ԱՄՆ նախագահ Դոնալդ Թրամփին։ Զելենսկու հետ այս՝ վերջին չորս ամիսների ընթացքում առաջին անձնական հանդիպումից հետո Թրամփը հայտարարել է, որ ԱՄՆ-ը կարող է վերականգնել ռուսական նավթի նկատմամբ պատժամիջոցները, որոնք ժամանակավորապես դադարեցվել էին Իրանի հետ պատերազմի ընթացքում։
Երեքշաբթի G7-ի երկրները նաև անցկացրել են ընդհանուր նիստ՝ ուկրաինական պատվիրակության մասնակցությամբ։ Ինչպես հաղորդում են միջազգային լրատվական գործակալությունները, յոթ երկրների առաջնորդները կրկին պայմանավորվել են «ուժեղացնել ճնշումը Ռուսաստանի նկատմամբ»։
Զելենսկու սոցիալական ցանցերի պաշտոնական էջերում հրապարակվել են նրա և Թրամփի զրույցի լուսանկարները, որոնք արվել են նիստերի ընդհանուր դահլիճում։ Լուսանկարներից երևում է, որ հանդիպմանը, բացի Զելենսկուց և Թրամփից, մասնակցել են նաև Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովը և ԱՄՆ պետքարտուղար Մարկո Ռուբիոն։
Կարճ հանդիպումից հետո Վլադիմիր Զելենսկին լրագրողներին հայտնել է, որ Թրամփի հետ քննարկել է նաև Ուկրաինայի կողմից ամերիկյան զենիթահրթիռային համակարգերի հրթիռների արտադրության լիցենզիաներ ստանալու հարցը։
