Ջեմմա Խաչատրյանն ավելի քան 37 տարի ապրում է ժամանակավոր կացարանում՝ Գյումրու տնակային թաղամասերից մեկում։ 1988թ․-ի երկրաշարժի հետևանքով կորցրել են իրենց տունը։ Կիսաքանդ տնակում բնակվում է դստեր և թոռնուհու հետ։
60-ամյա կինը տնակում ապրելու տարիներին ձեռք է բերել լուրջ առողջական խնդիրներ, դուստրը ևս ունի առողջական խնդիրներ։
Ջեմմա Խաչատրյանը պատմում է, որ պետությունից բնակարանի գնման սերտիֆիկատ են ստացել, բայց ամուսինը վաճառել է, ինքն այդպես էլ չի հասկացել, թե ինչպես է ծախսվել այդ գումարը ու մինչ օրս մնացել են ժամանակավոր կացարանում, որն օր օրի ավելի է քայքայվում՝ բնակության համար դառնալով ոչ պիտանի։
Ջեմմա Խաչատրյանը նշում է, որ հենց տան պատճառով էլ ընտանիքում վեճեր են սկսվել, ի վերջո, բաժանվել է ամուսնուց։ Բայց դեռ ինչքան կկարողանան ապրել տնակում, արդեն խիստ խնդրահարույց է։
Պայմանները, տիկին Ջեմմայի խոսքով, սարսափելի են, քանի որ կտուրից անընդհատ ջուր է կաթկթում, տան անկյուններում խոտ է աճում, վխտում են առնետները։
