ԱՄՆ ներկայացուցիչները Կիևում ԵՄ երկրների պաշտոնյաների և դեսպանների հետ հանդիպումից հետո հայտարարել են, որ Վաշինգտոնը «առանձնահատուկ ճկունություն» չի ցուցաբերի «Թրամփի ծրագրի» քննարկման ժամանակ, գրում է Financial Times-ը։
Այսպես, ԱՄՆ բանակի նախարար Դենիել Դրիսկոլն ասել է, որ լավատեսորեն է տրամադրված Մոսկվայի հետ գործարքի հարցում, իսկ Ուկրաինան «շատ վատ վիճակում է»։
«Ինչքան էլ մենք շարունակվող պատերազմում աջակցենք Ուկրաինային, կան սահմաններ։ Կան նաև լուրջ հիմքեր ենթադրելու, որ Ռուսաստանը հզոր արդյունաբերական բազա ունի, և ժամանակի հարց է, թե երբ Ուկրաինան ստիպված կլինի գործարք կնքել», — հայտարարել է Ուկրաինայում ԱՄՆ գործերի հավատարմատար Ջուլի Դևիսը, որի նստավայրում էլ տեղի է ունեցել հանդիպումը, տեղեկացնում է DW-ն։ Նա, ինչպես Դրիսկոլը, կրկնել է Թրամփի խոսքերն այն մասին, որ Կիևը պետք է գործարքն ընդունի մինչև նոյեմբերի 27-ը։
Financial Times-ի տվյալներով, եվրոպացի բարձրաստիճան պետական ծառայողներից մեկը հանդիպման տոնը «սրտխառնուք առաջացնող» է անվանել։ Հանդիպմանը ներկաների մոտ տպավորություն է ստեղծվել, որ Վաշինգտոնը փորձում է արագ հասնել խաղաղ համաձայնության՝ օգտագործելով Զելենսկու քաղաքական թուլությունը կոռուպցիոն սկանդալի ֆոնին, գրում է պարբերականը։ Այսպես, Ռուսաստանի վրա ճնշումը ուժեղացնելու կոչերին ԱՄՆ ներկայացուցիչները պատասխանել են, որ «Թրամփի ծրագրում» առաջարկված պայմանները լավագույնն են, ինչին Ուկրաինան կարող է հույս ունենալ։
