Խուլիգանության կասկածանքով մեկ անձ ձերբակալվել և ներկայացվել է Քննչական կոմիտե։ Այս մասին NEWS.am-ի փոխանցմամբ՝ հայտնել է ՆԳՆ ոստիկանությունից՝ անդրադառնալով Վաղարշապատում «Մայր Հայաստան» կուսակցության աջակից Օնո Հարությունյանին առևանգելու դեպքին։
Ավելի վաղ տեղեկություն է տարածվել, որ Վաղարշապատում անհայտ անձինք՝ քաղաքացիական հագուստով, հարձակվել են, տապալել գետնին և առևանգել «Մայր Հայաստան» շարժման աջակից, բլոգեր Օնո Հարությունյանին։
«Հիմա ուզում ենք հասկանալ, թե ովքեր են եղել այդ անձինք։ Օնո Հարությունյանը մեր շարժման աջակիցն է և տարիներ շարունակ սուր քննադատում է իշխանություններին։ Նա Վաղարշապատում հայտնի բլոգեր է։ Այս ընտրություններում մեզ է աջակցում։ Ընկերուհու հետ է եղել։ Հիմա մեր փաստաբաններին խնդրել ենք պարզել, թե ինչ է տեղի ունեցել»,–ասել է Անդրանիկ Թևանյանը։
Բլոգերի ընկերուհին մանրամասներ է պատմել, որ իրենք մեքենայով են եղել, երբ երեք այլ մեքենաներ հետեւից եկել են, 5-6 հոգով հարձակվել են ընկերոջ վրա, քարշ տալով տարել են։
