Ակնկալվում է, որ ընկերությունը պատասխանատու կլինի TRIPP զարգացման համար 49 տարի նախնական ժամկետով, Հայաստանն ԱՄՆ-ին առաջարկելու է TRIPP զարգացման ընկերության 74 տոկոս բաժնեմասը՝ իրեն պահելով 26 տոկոսը: Ակնկալվում է, որ այս համագործակցությունը կերկարաձգվի ևս 50 տարով, եթե կողմերից որևէ մեկը առարկություն չունենա և բավարարված լինի համագործակցությունից: Այս համագործակցությունը 49 տարին լրանալուց հետո կերկարաձգվի ևս 50 տարով՝ Հայաստանի կառավարությանը հավելյալ սեփականության տրամադրմամբ՝ նրա մասնաբաժինը դարձնելով 49 տոկոս: Այս մասին TRIPP-ի վերաբերյալ ստորագրված ՀՀ-ԱՄՆ հայտարարության մասին ասուլիսում ասել է ԱԳ նախարար Արարատ Միրզոյանը:
«TRIPP զարգացման ընկերությունը կունենա ամերիկյան վերահսկիչ փաթեթ բաժնեմասերի, և այնուամենայնիվ կլինեն որոշ սկզբունքային հարցեր, որտեղ ՀՀ-ն նույնիսկ չունենալով վերահսկիչ փաթեթ՝ կունենա իր վերահսկողությունը: Կլինեն հարցեր, որտեղ անկախ բաժնեմասերի չափից, առանց Հայաստանի Հանրապետության համաձայնություն ոչինչ տեղի ունենալ չի կարող: Փաստաթղթում հստակ նշված է, բաժնեմասերի օտարման, վաճառման, անջատման կամ վերակազմակերպան ու այլ փաստացի ու իրավական գործողությունների զարգացման դեպքում, ինչպես նաև սեփականատերերի փոփոխության դեպքում անհրաժեշտ է Հայաստանի Հանրապետության և ԱՄՆ կառավարության նախորոք համաձայնությունը: Դա նշանակում է, որ չի կարող այդպիսի բան տեղի ունենալ՝ առանց ՀՀ-ի համաձայնության»,- նշել է նա:
Անդրադառնալով TRIPP-ի մասին քննարկումներին՝ Միրզոյանը շեշտեց, որ հստակ ամրագրում են, որ դավադրությունները բացառվում են. «Լսել ենք դավադրության տեսությունների մասին մեկնաբանություններ, որ բաժնեմասերը կհամաձայնենք կիսել Միացյալ Նահանգների և Հայաստանի միջև, և հետո ինչ-որ փուլում մեզնից թաքուն բաժնեմասերի ինչ-որ մաս կարող է վաճառվել այս կամ այն երկրին, հստակ ամրագրում ենք, որ այդպիսի բան առանց մեր համաձայնության բացառվում է տեղի ունենա, դա կլինի պայմանագրի խախտում, հետևաբար չի կարող»:
