2025 թվականի փետրվարի 5-ից Ռուսաստանում ներդրվեց վերահսկվող անձանց ռիեստր, ինչը նշանակում էր, որ ոչ թե անձանց անունները որևէ պատճառով հայտնվում էին ինչ-որ ցուցակներում, այլ երբ անձը հայտնվում էր վերահսկվող անձանց ռիեստրում, նրա բանկային հաշիվները սառեցվում են և որևէ պետական գերատեսչություն նրան ծառայություն չի մատուցում: Այս մասին այսօր՝ մարտի 4-ին, ասաց «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանը։
«Մարտի մեկից սկսած այս գերատեսչություններին միացավ նաև հարկայինը, և հարկային ծառայությունների նախ տեղեկանքի ձևը փոխվեց, որը այլևս թղթային տարբերակով չի, այն տրվելու է որպես էլեկտրոնային քաղվածք, և հարկերի չվճարումը կամ նման բանի հայտնաբերումը ևս կարող է հիմք հանդիսանալ, որ անձը հայտնվի վերահսկվող անձանց ռիեստրում։
Աշխատանքային միգրանտների աշխատանքային պայմանագրում նշված աշխատավարձի չափը շատ էական նշանակություն ունի վերահսկվող անձանց ռիեստրում նրանց հայտնվելու հետ։ Երբ մեր քաղաքացիները Ռուսաստանի Դաշնությունում կնքում են աշխատանքային պայմանագիր, շատ հաճախ կա այդպիսի պրակտիկա, որ գործատուն, որպեսզի շատ հարկեր չվճարի կամ երբ անձը, որը ֆիզանձի հետ է կնքում ծառայությունների մատուցման պայմանագիր ինքը շատ հարկեր չվճարի, պայմանագրում նշվում է մի աշխատավարձ, իսկ աշխատողը ստանում է մեկ այլ գումար: Եվ երբ իր աշխատավարձի չափ կամ ավելին փորձում է ուղարկել, օրինակ Հայաստան իր հարազատներին, այստեղ տվյալները միանգամից փոխանցվում են միգրացիոն ծառայություն, անձը պետք է հիմնավորի, որտեղից են այդ գումարները, գումարների ծագումը, այլապես ինքը կհայտնվի վերահսկվող անձանց ռիեստրում և կարող է արտաքսվել»,- ասաց նա:
Մանրամասն՝ տեսանյութում։
