Մարդու իրավունքների պաշտպանի ներկայացուցիչներն այցելել են Արթուր Օսիպյանին՝ նրան մտահոգող հարցերին ծանոթանալու նպատակով, սակայն նա սկզբում հրաժարվել է առանձնազրույցից։ Այս մասին լրագրողների հետ զրույցում հայտնել է Հայաստանի ՄԻՊ Անահիտ Մանասյանը։ Հիշեցնենք, որ Օսիպյանը կալանավորվել էր վարչապետի մասնակցությամբ տեղի ունեցած միջադեպից հետո և այժմ հացադուլ է հայտարարել՝ պահանջելով, որ Նիկոլ Փաշինյանը հրապարակային կերպով ներողություն խնդրի իրենից։
Պաշտպանի խոսքով՝ ՄԻՊ գրասենյակն արդեն ուսումնասիրել է համացանցում առկա տեղեկությունները։ Բացի այդ, խոշտանգումների կանխարգելման ազգային մեխանիզմի շրջանակում այս շաբաթ այց է կատարվել «Նուբարաշեն» քրեակատարողական հիմնարկ՝ կարանտինում գտնվող և հացադուլ հայտարարած անձանց խնդիրներին ծանոթանալու համար։ Տեղում ուսումնասիրվել է իրավիճակը, այդ թվում՝ Արթուր Օսիպյանի խնդիրները, և հարցերի մի մասը լուծվել է հենց տեղում։ Ինչ վերաբերում է Օսիպյանի առողջական վիճակին, ապա Օմբուդսմենը հրաժարվել է մանրամասներ հայտնել՝ հարգելով բժշկական գաղտնիքն ու անձնական տվյալների պաշտպանվածությունը։
Անդրադառնալով այն հարցին, թե արդյոք պատրաստվում է միջնորդ հանդիսանալ՝ հաշվի առնելով, որ Օսիպյանը ներողություն է պահանջում Փաշինյանից, Պաշտպանը հիշեցրել է, որ իր լիազորությունները նման գործառույթ չեն նախատեսում։ Օմբուդսմենի առաքելությունն է հետևել գործընթացին և արձանագրել հնարավոր խախտումները։
Օմբուդսմենը կրկին վերահաստատել է իր նախկին դիրքորոշումն այն մասին, որ համատարած կերպով կալանքը՝ որպես խափանման միջոց կիրառելը խնդրահարույց է։ Հարցին՝ արդյո՞ք հետևում է իշխանամետ գործիչների և վարչապետի աջակիցների հռետորաբանությանը, Մանասյանը նշել է, որ տարբեր քաղաքական ուժեր «աչքի են ընկել» անթույլատրելի հայտարարություններով։ Այդուհանդերձ, Մարդու իրավունքների պաշտպանն արձանագրել է, որ հանրության շրջանում ընտրողական արդարադատության տպավորություն է ստեղծվել։ Նրա խոսքով՝ եթե կա նման ընկալում, ապա կա՛մ խնդիրն իրականում առկա է, կա՛մ իրավիճակը հանրությանը ճիշտ չի ներկայացվում։
