Մեծ Բրիտանիան, Ֆրանսիան և Գերմանիան քննարկում են Ռուսաստանի ներգրավմամբ խաղաղ բանակցությունների հնարավորությունը։ Այդ մասին հայտնում է Bloomberg-ը՝ հղում անելով իր աղբյուրներին։
Գործակալության զրուցակիցների խոսքով՝ եվրոպացի պաշտոնյաները այս գաղափարը քննարկում են իրենց ուկրաինացի գործընկերների հետ։
Քանի որ ԱՄՆ-ի մասնակցությամբ բանակցությունները փակուղի են մտել, իսկ Ռուսաստանը ճակատում իբր կրում է զգալի կորուստներ՝ առանց էական առաջընթացի, Ֆրանսիան, Գերմանիան և Մեծ Բրիտանիան կարծում են, որ այժմ հարմար պահ է փորձելու Մոսկվային բերել բանակցությունների սեղանի շուրջ։
Միաժամանակ, աղբյուրների փոխանցմամբ, Ռուսաստանի հետ բանակցությունների շուրջ վերջնական որոշումը կմնա Վլադիմիր Զելենսկիի ձեռքում։ Եվրոպական երկրները չեն ճնշի Զելենսկուն՝ ընդունելու այնպիսի ռազմավարություն, որի հետ նա կարող է համաձայն չլինել։
Գործակալության տվյալներով՝ առաջիկա օրերին Քիր Սթարմերը նախատեսում է հնարավոր բանակցությունների հարցը քննարկել Ֆրիդրիխ Մերցի և Էմանուել Մակրոնի հետ։
Ֆրանսիայի և Մեծ Բրիտանիայի կառավարությունները չեն պատասխանել Bloomberg-ի մեկնաբանության խնդրանքին, իսկ Գերմանիայի կառավարությունը հրաժարվել է մեկնաբանություններից։
