Բունդեսթագը երկրորդ փորձից, մեծամասնության ձայներով Գերմանիայի կանցլերի պաշտոնում ընտրեց Քրիստոնեա-դեմոկրատական կուսակցության առաջնորդ Ֆրիդրիխ Մերցին։ Նրա օգտին քվեարկեց 325 պատգամավոր, մինչդեռ հաղթանակի համար անհրաժեշտ էր առնվազն 316 ձայն։ Դեմ քվեարկեցին 289 պատգամավոր, հաղորդում է ՌԲԿ-ն։
Այժմ Մերցը և իր կաբինետի անդամները պետք է նշանակման պաշտոնական գրություն ստանան Գերմանիայի դաշնային նախագահ Ֆրանկ-Վալտեր Շտայնմայերից։ Դրանից հետո կավարտվի իշխանության փոխանցման գործընթացը, որը սկսվել էր Քրիստոնեա-դեմոկրատական միության և Քրիստոնեա-սոցիալական միության (ՔԴՄ/ՔՍՄ) պահպանողական բլոկի արտահերթ ընտրություններում հաղթանակից հետո։
Առաջին քվեարկությունը, որը կայացավ մայիսի 6-ին, Մերցը չհաղթահարեց՝ նրան չհերիքեց վեց ձայն։ Այսպիսով, առաջին անգամ Գերմանիայի Դաշնային Հանրապետությունում կառավարության ղեկավարի պաշտոնում առաջադրված հիմնական թեկնածուն չկարողացավ առաջին փորձից ստանալ խորհրդարանի աջակցությունը, չնայած հաջող կոալիցիոն բանակցություններին։ Երկրորդ քվեարկությունը որոշվեց անցկացնել նույն օրը՝ «Կանաչների» և Ձախերի խմբակցությունների համաձայնությամբ։ Ըստ Գերմանիայի Սահմանադրության՝ Բունդեսթագը կարող էր նաև առաջադրել այլ թեկնածուի և քվեարկել նրա օգտին 14 օրվա ընթացքում։
Նշանակալի է, որ ՔԴՄ/ՔՍՄ պահպանողական բլոկը և Սոցիալ-դեմոկրատական կուսակցությունը (ՍԴԿ) համաձայնություն էին ձեռք բերել կառավարող կոալիցիա կազմելու մասին և միասին Բունդեսթագում ունեն 328 մանդատ։ Այսինքն՝ Մերցի օգտին առաջին քվեարկության ժամանակ, ամենայն հավանականությամբ, իր դաշնակիցներից ոմանք չեն քվեարկել։
Նախօրեին Գերմանիայում պատշաճորեն հրաժեշտ տվեցին գործող կանցլեր Օլաֆ Շոլցին, որը կշարունակեր պաշտոնավարել որպես կառավարության ժամանակավոր ղեկավար, եթե Մերցը չկարողանար ապահովել երկրորդ քվեարկության անհրաժեշտ ձայները։
ՔԴՄ/ՔՍՄ բլոկը և ՍԴԿ-ն ավելի վաղ կարողացել էին պայմանավորվել կոալիցիոն համաձայնագիր կնքելու վերաբերյալ՝ Գերմանիայում նոր կառավարություն ձևավորելու համար։
Արտահերթ խորհրդարանական ընտրությունները Գերմանիայում անցկացվել էին փետրվարի 23-ին։ Բոլոր 299 ընտրատարածքներում ձայների հաշվարկից հետո հաղթանակ էր տոնել ՔԴՄ/ՔՍՄ բլոկը։ Երկրորդ տեղը զբաղեցրել էր «Գերմանիայի այլընտրանքը» (ԱդԳ)՝ իր պատմության մեջ ամենաբարձր՝ 20.8% արդյունքով։ ՍԴԿ-ն զբաղեցրել էր միայն երրորդ տեղը՝ հավաքելով 16.4% ձայներ, ինչը կուսակցության պատմության մեջ ամենաթույլ արդյունքն էր։
Բացի այդ, Բունդեսթագ են անցել նաև «Կանաչները» (11.6%), «Ձախ կուսակցությունը» (8.8%) և դանիական-ֆրիզական փոքրամասնության «Հարավային Շլեզվիգի ընտրողների միությունը», որը խորհրդարան է մտել մեկ մանդատով՝ շրջանային քվեարկության արդյունքում։
