Նախ հստակ է և որոշ է, որ Հովհաննավանքը սեփականության իրավունքով պատկանում է Մայր Աթոռ Սուրբ Էջմիածնին, և շատ հստակ է, որ Հովհաննավանքում այսօր խախտված է տեղի օրինավոր սպասավորների ծառայությունը։ Այս մասին այսօր՝ հոկտեմբերի 31-ին, լրագրողների հետ զրույցում ասաց Մայր Աթոռի տեղեկատվական համակարգի ղեկավար տեր Եսայի քահանա Արթենյանը։
«Ինչ վերաբերում է իրավական գործընթացներին, գիտեք, որ նաև Մայր Աթոռի անունից փաստաբանները դիմել են ոստիկանություն, այդ ապօրինի ներխուժումը կանխելու համար։ Փաստորեն հիմա այնտեղ մարդիկ ապօրինի ներխուժել են և ապօրինի գործունեություն են իրականացնում։ Այդ ամեն ինչը ժամ առաջ պետք է դադարեցվի։
Ինչ վերաբերում է իրավապահներին, այո մենք ունենք այդ մտահոգությունը որ իրավապահ համակարգը այս ամեն ինչի մեջ, մեղմ ասած, հապաղում է կամ անգործության է մատնված, ինչը անհասկանալի է»,– ասաց նա։
Հարցին, թե իրավապահ համակարգը որեւէ քայլ չանի, ի՞նչ է անելու Մայր Աթոռը, Տեր Եսային պատասխանեց. «Կապրենք, կտեսնենք, հիմա ես որևէ կանխատեսում անել չեմ կարող։ Մյուս ճանապարհները, որոնք հարցի լուծմանն են ուղղված, մեզ համար անընդունելի են այն առումով, որ կարող են, օրինակ, ասենք, գնալ ինչ-որ խմբով, Հովհաննավանք, իրենց դուրս վռնդել այնտեղից, բայց սա բախումների կարող է տանել։ Դրա համար այս առումով մենք ձեռնպահ ենք՝ հավատքով, հույսով, որ իրավապահները իրենց գործը կկատարեն»։
Մանրամասն՝ տեսանյութում։
