«Ժողովուրդ» օրաթերթը գրում է. «Փաստաբանական համայնքից «Ժողովուրդ» օրաթերթը տեղեկացավ, որ երեկ ՀՀ Քննչական կոմիտեն գործարար Սամվել Կարապետյանի ընկերության ձերբակալված աշխատակիցների առաջ ձայնագրություններ է դրել, որտեղ լսվում է քաղաքացու խոսակցություն, թե իրեն ստիպողաբար՝ շահագրգռելով բերել են հավաքի։

«Ժողովուրդ» օրաթերթին հասած լուրերի համաձայն՝ փաստաբանները հայտնել են, թե պարզել են արդյոք քննիչները՝ ովքեր են այդ մարդիկ, կա արդյոք մեկը, որը իրականում կգա ու կասի, որ ձայնագրության մեջ լսվող ձայնն իրենն է, և իրեն, այո, ստիպել են անցած շաբաթ իրականացված, Սամվել Կարապետյանի աջակցությանը նվիրված ակցիային մասնակցել։ Ի պատասխան այս պնդումների՝ չի եղել գեթ մեկ անձ, որը իրավապահներին անձամբ պատմած լինի այդ մասին. բացառապես ձայնագրություններ են եղել, որոնք, կասկածներ կան, որ սարքված են:

«Ժողովուրդ» օրաթերթը իրավապահ շրջանակի իր աղբյուրներից պարզեց, որ գործարարի ընկերության աշխատակիցներին երեկ՝ գիշերը, տարել են դատարան կալանավորելու նպատակով, ու կալանքները այսքանով չեն սահմանափակվելու. Փաշինյանը դեռ շատերին է բանտ ուղարկելու:

Հիշեցնենք, որ երեկ Հայաստանի էլեկտրական ցանցեր» ՓԲԸ–ի կենտրոնական գրասենյակում և գործարար Սամվել Կարապետյանի եղբորորդի Նարեկ Կարապետյանի տանն իրականացվեցին խուզարկություններ։ Դեպքից հետո Քննչական կոմիտեն հայտնեց, որ բացահայտվել են հուլիսի 4-ին հաջակցություն Ս.Կ.-ի կազմակերպված հավաքին մասնակցելուն հարկադրելու, նյութապես շահագրգռելու մի շարք դեպքեր. 3 անձի նկատմամբ հարուցվել է հանրային քրեական հետապնդում։ Մարդկանց անգամ կալանքի են տանում, բայց չկա մի քաղաքացի, որին իրականում ստիպել են ակցիայի մասնակցել, և որը հայտնել է քննիչներին այդ մասին»։

Առավել մանրամասն թերթի այսօրվա համարում