Բյուրեղավանում ուրբաթ օրվանից մատակարարվող ջրի որակն ու գրաֆիկը խայտառակ վատացել են։ Կոնկրետ իմ երեխան դպրոց է հաճախում, դասարանում ավելի քան 10 երեխա բացակայում է․ փորլուծություն, սրտխառնոց, ջերմություն ունեն։ Այս մասին «Փաստինֆո»-ի փոխանցմամբ՝ ահազանգել է Բյուրեղավանի բնակիչը։

«Համայնքապետարանի էջում երեկ գրել էին, թե քաղաքացիներն ապատեղեկատվություն են տարածում, թե ջրի հետ ոչ մի խնդիր չկա, այն դեպքում, երբ մարդիկ ընտանիքներով վատ էին զգացել։ Կանխարգելելու փոխարեն մի բան էլ մարդկանց են մեղադրել ապատեղեկատվություն տարածելու մեջ, այն դեպքում, երբ արդեն այսօր բժշկական կենտրոնը հայտնում է, որ ծանրաբեռնված աշխատում է։

Քաղաքացին ահազանգեց, որ ջրի հետ կապված իրավիճակը Բյուրեղավանում պարբերաբար կրկնվում է, և, իր համոզմամբ, դա իր պատճառներն ունի։

«Բանն այն է, որ մեր քաղաքապետը՝ Հակոբ Բալասյանը, ջրի բիզնես ունի։ Բնակիչներից շատերը կարծում են, որ ինքը ամիսը մեկ չգիտեմ՝ ոնց է անում, որ ջրերը կեղտոտվում են, որ իր ջուրը վաճառվի։ «Aqua Arma» ջուրը, պարզվում է, իրենն է, դրա համար էլ, որ ահազանգում ենք, ոչինչ չեն անում։

Մեզ ասում են՝ համայնքապետարանը պատասխանատու չէ։ Նույնը նաև «Վեոլիա Ջուրն» է ասում՝ ասում են՝ մեզանից չէ, չգիտենք, ամեն ինչ նորմալ է։ Ստացվում է՝ «Վեոլիա Ջուրն» ասում է՝ համայնքապետարանն է պատասխանատու, համայնքապետարանն էլ ասում է՝ «Վեոլիա Ջրի» տիրույթում է հարցը։

Հերիք չէ՝ նորմալ գրաֆիկով ջուր օրերով չենք ստանում։ Օրինակ՝ երեկ առավոտյան ժամը 7։30-ին տվել են, ժամը 11։00-ին՝ անջատել են, որովհետև հարևանությամբ դաչաներ կան, որտեղ փարթիներ էին սկսվում։ Արդյունքում մեր ջուրը տալիս են այնտեղ։ Ամբողջ ամառ մենք գրեթե ջուր չենք ունեցել, տալուց էլ թունավոր ջուր են տալիս։

Մեկ ամիս չկա, ինչ սկսել էինք ծորակի ջուր խմել, ու հիմա նորից նույն վիճակն է։ Երեկոյան ժամերին ընդհանրապես ջուր չենք ունենում․ ժամը 8։00-ին միացնում են, 9։00-ին՝ անջատում։ Ես ապրում եմ երկրորդ հարկում, մեր մոտ թույլ, բայց լինում է, իսկ շենքի վերևի հարկերում ընդհանրապես ջուր չի գալիս։

Բայց քաղաքապետին ոչինչ չի հետաքրքրում։ Վերջերս էլ անդամագրվել է ՔՊ-ին, երևի վստահ է, որ այդ դեպքում չի պատժվի»։

Քաղաքացին տեղեկացրեց, որ ապրիլից հետո համայնքի բնակիչներն արդեն երեք անգամ ջրից թունավորվելու դեպքեր են արձանագրել։ Նրա խոսքով՝ քաղաքում շատերը, այդ թվում՝ ինքը, կարծում են, որ սա ուղիղ կապ ունի քաղաքապետի բիզնեսի հետ։

«Որակը վատացնում են, որ ջուրը շատ վաճառվի։ Ստացվում է՝ կամ ջուր չունենք, կամ տալիս են ու մարդկանց թունավորում, կարևորը՝ քաղաքապետի ջրի բիզնեսը ծաղկի»։