Ի դեպ, Նիկոլ Փաշինյանն ու ՌԴ նախագահ Վլադիմիր Պուտինը վերջապես հեռախոսազրույց ունեցան՝ հայկական կողմի նախաձեռնությամբ։
Ըստ պաշտոնական հաղորդագրության՝ Փաշինյանը խնդրել է միջոցներ ձեռնարկել՝ ՌԴ շուկա հայկական արտահանման նկատմամբ սահմանափակումների հետևանքով առաջացած խնդիրները կարգավորելու համար։
Հետաքրքիր է։ Առաջին սահմանափակումների կիրառման պահից ի վեր ՔՊ-ականները ջանք չէին խնայում համոզելու, որ արտահանման շուկաները հաջողությամբ դիվերսիֆիկացվել են, և հայ տնտեսվարողներն առանց ռուսական շուկայի նույնիսկ ավելի մեծ հնարավորություններ կունենան։ Փաստորեն, իրականությունը լրիվ այլ է։
Հիշեցնենք նաև, որ Փաշինյանը խոստանում էր ընտրություններից հետո՝ հունիսի երկրորդ կեսին, հանդիպել Պուտինի հետ և լուծել կուտակված բոլոր խնդիրները։ Էկոնոմիկայի նախարար Գևորգ Պապոյանն էլ վստահեցնում էր, որ հունիսի 8-ից բոլոր սահմանափակումները կվերացվեն։
Սակայն հանդիպումն այդպես էլ չկայացավ, միայն 50 օր անց՝ հեռախոսազրույց։ Պուտինն անգամ չշնորհավորեց Փաշինյանին ընտրություններում այսպես կոչված հաղթանակի համար, իսկ սահմանափակումները ոչ միայն չվերացան, այլ օրեցօր ավելի են խստանում։ ՌԴ նախագահը պահանջել է հնարավորինս սեղմ ժամկետում հանրաքվե անցկացնել՝ «ԵՄ, թե՞ ԵԱՏՄ» հարցադրումով։
Ըստ երևույթին, ռուսական կողմը Հայաստանի համար որոշակի վերջնաժամկետ է սահմանում։ Թե ինչ հետևանքներ կարող են լինել այդ ժամկետը չպահպանելու դեպքում, հստակ հայտնի չէ, թեև տարբեր ենթադրություններ արդեն շրջանառվում են։ Մի բան, սակայն, ակնհայտ է․ բոլոր զրկանքներն ու անհարմարությունները կրկին թափվելու են Հայաստանի Հանրապետության հպարտ քաղաքացիների գլխին։
