Ոչ միայն Ռուսաստանը, այլև Եվրասիական տնտեսական միության (ԵԱՏՄ) մյուս անդամ երկրները՝ Բելառուս, Ղազախստան և Ղրղզստան, կարծում են, որ Հայաստանի՝ Եվրոպական միության հետ մերձեցման քաղաքականությունը լուրջ տնտեսական ռիսկեր է ստեղծում միության համար։ Այդ մասին ՏԱՍՍ-ի փոխանցմամբ՝ հայտնել է Ռուսաստանի արտաքին գործերի նախարարի տեղակալ Միխայիլ Գալուզինը։
Գալուզինի խոսքով՝ այս երկու ինտեգրացիոն միավորումները սկզբունքորեն անհամատեղելի են։ «Եվրասիական տնտեսական միությունը իր կարգավորող և օրենսդրական հիմքերով արմատապես, կտրուկ և լիովին տարբերվում է Եվրոպական միությունից», — ընդգծել է նա։ Այդ պատճառով, նրա խոսքով, ԵՄ-ին անդամակցելու գործընթացի մեկնարկը մի երկրի համար, որը շարունակում է մնալ ԵԱՏՄ անդամ, «ինքնին արդեն անընդունելի է Ռուսաստանի համար»։
Գալուզինը նաև նշել է, որ հայկական արտահանման, այդ թվում՝ ագրոարդյունաբերական համալիրի արտադրանքի, զգալի մասը բաժին է ընկնում Ռուսաստանին և ԵԱՏՄ մյուս երկրներին։ Նրա խոսքով՝ մի շարք ապրանքների դեպքում այդ ցուցանիշը հասնում է 90–100 տոկոսի։ Նա կարծում է, որ Հայաստանի ղեկավարությունը պետք է «բացատրի երկրի բնակչությանը, թե Եվրամիությանը անդամակցելու դեպքում ինչ արտոնություններ կկորցնի երկիրը»։
Դիվանագետը նաև ընդգծել է, որ Մոսկվան ակնկալում է, որ Հայաստանում կանցկացվի հանրաքվե, որի ընթացքում երկրի քաղաքացիները կկարողանան արտահայտել իրենց դիրքորոշումը Եվրամիությանն անդամակցելու հեռանկարի վերաբերյալ։
