ԱՄՆ նախագահ Դոնալդ Թրամփի՝ ազգային անվտանգութան հարցերով խորհրդական Մայք Ուոլթսը հեռախոսազրուց է ունեցել Իլհամ Ալիևի՝ ազգային անվտանգության հարցերով խորհրդական Հիքմեթ Հաջիևի հետ։
«Հարավային Կովկասում հակամարտությունը պետք է ավարտվի։ Այս շաբաթ ես խոսեցի Ադրբեջանի նախագահի ազգային անվտանգության հարցերով խորհրդական Հիքմեթ Հաջիևի հետ։
Մենք ուրախ ենք, որ Ադրբեջանն ու Հայաստանը մեծ առաջընթաց են գրանցել և համաձայնել են խաղաղության պայմանագրի շուրջ։ Ես նրան ասացի, որ մենք պետք է այժմ վերջնականացնենք այս խաղաղության համաձայնագիրը, ազատենք բանտարկյալներին և միասին աշխատենք տարածաշրջանը ավելի անվտանգ ու բարգավաճ դարձնելու համար։
Ամերիկայի Ոսկե դարը խաղաղություն և բարգավաճում կբերի աշխարհին, և մենք չենք դադարեցնի մեր ջանքերը, մինչև դա իրականություն չդառնա»,-գրել է Ուոլթսը X-ի իր միկրոբլոգում։
Ամերիկայի Հայ Ազգային Կոմիտեն, արձագանքելով ամերիկացի պաշտոնյայի գրառմանը, նշել է, որ «Հայ Դատի» հանձնախումբը ձգտում է իրական խաղաղության՝ արդար և հարատև խաղաղություն, որը հարգում է հայ ժողովրդի իրավունքները և ապահովում է հայերի վերադարձը Արցախ, ոչ թե կեղծ «խաղաղություն»՝ Երևանին զենքի ներքո պարտադրված Հայաստանի անվտանգության և ինքնիշխանության միակողմանի հանձնում։
.JPG)
