«Ձեր վարույթում եղել են բազմաթիվ գործեր, որոնք ունեցել են ակնհայտ քաղաքական երանգներ։ Դրանցում ներգրավված են եղել մարդիկ, ովքեր ունեն կոնկրետ ընդդիմադիր հայացքներ, որոնց համար հետապնդվել են։ Եվ ես չգիտեմ այդ գործերից գոնե մեկը, որով դուք, որպես դատավոր, կունենայիք էն անկախությունը՝ արդարադատություն իրականացնելու։ Հիմա էս գործերի շարունակական և բազմաթիվ լինելը, բնականաբար, չի կարող կասկածներ չհարուցել, ավելին՝ համոզմունք ունենալ, որ այս գործով էլ, բնականաբար, չեք լինելու արդար»,- դատական նիստի ընթացքում բացարկի միջնորդություն ներկայացնելով դատավոր Կարեն Ֆարխոյանին, ասաց ԱԺ «Հայաստան» խմբակցության պատգամավոր Լևոն Քոչարյանը։ Հիշեցնենք, Լևոն Քոչարյանը մեղադրվում է 4 կարմիր բերետավորների ծեծելու մեջ։

«Շատ լավ գիտեք ես ով եմ, ով եմ այս իշխանությունների համար և ինչ կարգի քաղաքականացված գործ է սա։ Եվ այս մասով ցանկացած օբյեկտիվ որոշում հաճելի չի լինի այս իշխանություններին, և ես ունեմ այն համոզմունքը, որ ձեր որոշուները չեն կարող լինել այնպիսին, որ իշխանությունների, վարչապետի սրտով չի լինի»,- ասաց Լևոն Քոչարյանը։

«Չգիտեմ՝ դուք որպես մարդ, ընտանիքի հայր, սրտացավ եղբայր․․․ Ձեր անձի հետ խնդիր չունեմ, բայց կա հստակ համոզմունք՝ ձեզ, որպես դատավորի, հատկապես իրավական համայնքի հետ քիչ թե շատ գործընթացներին ծանոթ մարդկանց մեջ, որ դուք քաղաքական երանգներ ունեցող գործերով չեք հանդես գալիս որպես անկախ դատարան։

Խնդրանքս է, պահանջս է ձեզնից ու նաև էն դատավորներից, ովքեր նման գործերով ինչ-ինչ պատճառներով չեն կարողանում իրականացնել արդարադատություն, պարզապես չանեն դա։ Սա նույն է, որ ինչ-որ մեկը գնա բժշկի վիրահատության, վիրահատող բժշկն ասի՝ գիտե՞ք, ինքը ուրիշ քաղաքական հայացքներ ունի, ինչ-որ մեկին դեմ է, ու ես իրեն պետք է վատ վիրահատեմ։ Չի կարող, մարդկանց հետ են խաղում վերջ ի վերջո։

Լավ, եթե չկա էդ խիզախությունը և, տարբեր հանգամանքներից ելնելով, արդարադատություն իրականացնելու ունակություն, պետք է առնվազն թողնել-գնալ գործից։ Սա կլինի արդար մոտեցում, սա կլինի մարդկային մոտեցում։

Անկեղծորեն, էնպես չէ, որ հույս ունեմ, որ եթե դուք չլինեք, ուրիշը լինի, ավելի արդար կլինի։ Չէ, խոսքը սրա մասին չէ։ Բայց ամեն մեկը գոնե աա պետք է իր մեջ ունենա ու հասկանա, որ մարդկանց կյանքի հետ են խաղում ու շատ մեծ պատասխանատվություն կա այս ամեն ինչի տակ։

Ամեն մեկս էլ մեր կյանքում ունենք մեր անձնական խնդիրները, տարբեր հարցեր, բայց ես չեմ դատավոր, դուք եք դատավոր ու էդ կարգավիճակը ունենալով՝ պետ է հաշվի նստել տեղի ունցած ամեն ինչի հետ»,- ասաց Լևոն Քոչարյանը։

Մանրամասն՝ տեսանյութում։