Հակակոռուպցիոն դատարանը ՊԵԿ նախկին նախագահ, ֆինանսների նախկին նախարար Գագիկ Խաչատրյանի կալանքի ժամկետը երկարացրել է երկու ամսով։

Նրա պաշտպան Երեմ Սարգսյանի խոսքով՝ սեպտեմբերի 2-ից կալանքի տակ գտնվող Խաչատրյանը ողնաշարի խնդիրների պատճառով մշտապես պառկած է։ Արդեն առաջացել են պառկելախոցեր, և չի բացառվում նաև թոքաբորբի զարգացումը։

Փաստաբանի փոխանցմամբ՝ բազմիցս դիմել են Քրեակատարողական բժշկության կենտրոն՝ Խաչատրյանին ստացիոնար բուժման տեղափոխելու խնդրանքով, սակայն դիմումները չեն բավարարվել։ Կալանքի ժամկետի երկարացման հարցով դատական նիստի ընթացքում նրա ինքնազգացողությունը վատացել է, և նիստն ընդմիջվել է՝ ցավազրկող ներարկելու համար։