Ցույցեր նախապատրաստելը, անհնազանդության ակցիաներ նախապատրաստելու մասին խոսելը ներկայացնել որպես ահաբեկչություն՝ բացարձակ աբսուրդ է։ Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Լևոն Քոչարյանը։
ՔԿ-ի կողմից հրապարակված մոնտաժված ձայնագրության մեջ լսվում է ձևակերպում, թե Բագրատ Սրբազանն ասում է, որ պետք է փոխանցի Քոչարյանին՝ ակտիվանալ։ Արդյո՞ք երկրորդ նախագահի որդին չունի մտավախություն, որ իր նկատմամբ ևս քրեական հետապնդում կհարուցվի, ինչին ի պատասխանեց պատգամավորը նշեց. «Աբսուրդի ժանրում ամեն ինչ էլ հնարավոր է։ Բայց որևէ անիրավական բան ես չեմ արել։ Իմ կողմից ընդհանրապես չի եղել որևէ խոսակցություն որևէ մեկի հետ, այդ թվում՝ Բագրատ Սրբազանի հետ, որևէ բանի շուրջ, որը կարող է խնդիր առաջացնել Քրեական օրենսգրքի որևէ հոդվածի տեսանկյունից։
Մենք հիշում ենք շատ դեպքեր, որոնք մեծ աղմուկով ներկայացվել են, բայց հետո փլվել են շատ արագ։ Օրինակ՝ անցած տարվա Հրաչ Ղևոնդյանի՝ Սպիտակցի Հայկոյի հետ կապված գործը. սկսեցին մեծ աղմուկով, տարան կալանքի, բայց հետո պարզվեց՝ հիմարություն էր, ոչինչ չկար տակը։ Նույնը՝ Ալբերտ Բազեյանի գործով։ Շատ նմանատիպ դեպքեր են եղել։ Նրանց նպատակը հենց սկզբում աղմուկ ստեղծելն է։ Նախաքննական գաղտնիք կոչվածն օգտագործում են՝ ձայնագրություններից կտրված հատվածներ ներկայացնելով իրենց հարմար ձևով՝ առանց շարունակության։ Այս ամենը արվում է ընդդիմությանը վարկաբեկելու և վախ սերմանելու համար։ Բայց, կարծում եմ, մենք արդեն այդ փորձն ունենք»։
Մանրամասն՝ տեսանյութում։
