Եվրոպական մամուլի լուսաբանման մեջ ներկայումս ՀՀ երկրորդ նախագահ Ռոբերտ Քոչարյանի կալանավորումը միայն կոռուպցիոն գործ չի ներկայացվում։ Հատկապես Euronews-ի մոտ այն շատ հստակ կապվում է Հայաստանի արտաքին քաղաքական շրջադարձի հետ:

Euronews — ամենաուժեղ շեշտը աշխարհաքաղաքականության վրա։
Վերնագրում Քոչարյանը ներկայացվում է որպես Մոսկվային մոտ ընդդիմության առաջնորդ, իսկ հոդվածի գլխավոր թեզերից մեկն այն է, որ ձերբակալությունը կարող է լինել «ազդանշան Կրեմլին»։ Euronews-ը միաժամանակ ներկայացնում է պաշտոնական մեղադրանքները՝ իշխանության չարաշահում, կաշառք և խոշոր չափերի փողերի լվացում, ինչպես նաև  պնդումը, որ սա իշխանությունների հերթական հարձակումն է։

Euronews-ի ֆրանսիական և գերմանական տարբերակները նույնպես նույն գիծն են պահում։ Ֆրանսերեն վերնագրում ուղղակիորեն ասվում է, որ Մոսկվային մոտ ընդդիմադիր Քոչարյանի ձերբակալությունը, ըստ վերլուծաբանների, Փաշինյանի ուղերձն է Մոսկվային։ Գերմանական տարբերակում նույնպես առանձնացվում է «ազդանշան Կրեմլին» ձևակերպումը։

Reuters — ավելի զուսպ, բայց քաղաքական ենթատեքստը նույնպես ընդգծված է։
Reuters-ը առաջին հերթին նկարագրում է քրեական գործը և պաշտոնական մեղադրանքները, սակայն Քոչարյանին ներկայացնում է որպես Փաշինյանի՝ դեպի Արևմուտք ուղղված քաղաքականության ամենաակտիվ քննադատներից մեկը։ Հոդվածը նաև նշում է, որ իշխանությունների քննադատները վերջին գործողությունները դիտարկում են որպես ընդդիմության, այդ թվում՝ ռուսամետ ուժերի դեմ քաղաքական ճնշում։

Associated Press — առանձնացնում է երկու հակադիր վարկածները։
Մի կողմից՝ իշխանությունները խոսում են պետական գույքի շուկայական արժեքից ցածր վաճառքի, լիազորությունների չարաշահման, կաշառակերության և փողերի լվացման մասին։ Մյուս կողմից՝ Քոչարյանի դաշնակիցները գործը անվանում են քաղաքական վրեժխնդրություն։ AP-ն նույնպես այն տեղավորում է Փաշինյանի արևմտամետ կառավարության և Քոչարյանի գլխավորած ռուսամետ ընդդիմության հակամարտության շրջանակում:

Եվրոպական մամուլը Ռոբերտ Քոչարյանի կալանավորումը չի ընդունում որպես պարզապես քրեական պատմություն․ այն կապում է Փաշինյանի իշխանության՝ ընդդիմության դեմ պայքարի և Ռուսաստանի հետ առճակատման հետ։