Արմավիրի մարզի առաջին ատյանի ընդհանուր իրավասության դատարանում (Վաղարշապատ, Սուրբ Գրիգոր Լուսավորչի փողոց 15, թիվ 1 դատական նիստերի դահլիճ) տեղի է ունենում Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի և Գերագույն հոգևոր խորհրդի անդամ վեց եպիսկոպոսների քրեական գործի վերաբերյալ դատական նիստ։
Գործը քննող դատավոր Հակոբ Մանուկյանը օգոստոսի 7-ի անդրանիկ նիստում ինքնաբացարկ հայտնեց: Այնուհետև գործը մակագրվել էր Արմավիրի մարզի առաջին ատյանի ընդհանուր իրավասության դատարանի դատավոր Սերժ Ռուշանյանին։ Նա գործն ուղարկել էր Երևանի քաղաքի առաջին ատյանի ընդհանուր իրավասության քրեական դատարան՝ տարածքային ընդդատության կանոնների հարցը լուծելու համար։ Երևանի առաջին ատյանի դատարանն էլ ուղարկել էր Վճռաբեկ դատարան՝ այս հարցին հանգուցալուծում տալու համար։ Վճռաբեկից գործն ուղարկվեց Արմավիրի մարզի դատարան, և գործը կրկին մակագրվեց Սերժ Ռուշանյանին։
Մեղադրյալներն են Ամենայն Հայոց կաթողիկոս Գարեգին Բ Ներսիսյանը, ինչպես նաև Գերագույն հոգևոր խորհրդի անդամներ Նաթան արքեպիսկոպոս Օհանիսյանը, Հայկազուն-Վրեժ արքեպիսկոպոս Նաջարյանը, Վահան եպիսկոպոս Հովհաննէսեանը, Էդգար եպիսկոպոս Հակոբյանը, Նելսոն եպիսկոպոս Բաբայանը և Արթուր եպիսկոպոս Հակոբյանը։
Նրանց մեղադրանք է առաջադրվել ՀՀ քրեական օրենսգրքի 507-րդ հոդվածի 2-րդ մասով՝ պաշտոնեական դիրքն օգտագործելու միջոցով դատարանի օրինական ուժի մեջ մտած դատական ակտի կատարումը խոչընդոտելու համար։ Այն է՝ կարգալույծ արված Գևորգ եպիսկոպոս Սարոյանի պաշտոնավարումը չի ապահովվել՝ ի հեճուկս դատարանի որոշման։
Մեղադրանքը փաստաբաններն ու հոգևորականները համարում են անհիմն, մանավանդ որ կաթողիկոսի նման որոշումները դատական քննության ենթական չեն։
Դատական նիստն առաջարկում ենք դիտել ուղիղ հեռարձակմամբ։
