«Այս պահին բոլոր ահազանգերի հիման վրա շրջայց է իրականացվում»,- այս մասին Yerevan.Today-ի հետ զրույցում ասաց ԿԸՀ խոսնակ Սեդա Ղուկասյանը՝ անդրադառնալով Էջմիածնում ՔՊ-ի կողմից ընտրախախտումներ թույլ տալու հետ կապված ահազանգի մասին հարցին։
«ԿԸՀ թիվ 14 ընտրատարածքային ընտրական հանձնաժողովի անդամները վաղ առավոտից սկսել են շրջայց իրականացնել՝ հասկանալու, թե որտեղ է առկա չթույլատրված պաստառներ և բոլոր այն դեպքերում, երբ դրանք կհայտնաբերվեն, ԿԸՀ անդամները կդիմեն իրավասու մարմիններին՝ ՆԳՆ և համայնքապետարան։
ԿԸՀ-ն պաստառ հեռացնելու գործառույթ չունի»,- նշեց նա։
Ղուկասյանը տեղեկացրեց նաև, որ արգելված պաստառների մասով դիմում են ստացել Էջմիածնի ընտրություններին մասնակցող կուսակցություններից մեկի կողմից և առաջիկայում պաստառները կհեռացվեն իրավապահ մարմինների կողմից։
Ավելի վաղ «Առաջ» աջակենտրոն կուսակցության գործադիր կոմիտեի անդամ Նարեկ Մանթաշյանը գրել էր, որ «ընտրապայքարի առաջին իսկ րոպեներից ՔՊ-ական անօրինությունն ու բեսպրեդելը հատում են թույլատրելիի սահմանը»։
