Իրանի ԱԳ նախարար Աբբաս Արաղչին Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի հետ հեռախոսազրույց է անցկացրել և խիստ քննադատության ենթարկել ԱՄՆ-ին, Մեծ Բրիտանիային, Գերմանիային ու Ֆրանսիային։
Ինչպես հայտնում է Իրանի ԱԳՆ մամուլի ծառայությունը, Արաղչին նշել է, որ Ատոմային էներգիայի միջազգային գործակալության կառավարիչների խորհրդի հակաիրանական բանաձևը, որի հեղինակներն են նշված երկրները, հիմք են ստեղծել Իսրայելի համար՝ հարվածելու Իրանի միջուկային օբյեկտներին։
«Աբբաս Արաղչին քննադատել է ԱԷՄԳ-ի կառավարիչների խորհրդի կողմից վերջերս ընդունված բանաձևը Իրանի խաղաղ միջուկային ծրագրի վերաբերյալ, որն առաջարկվել էր «եվրոեռյակի» և ԱՄՆ-ի կողմից։ Իրանի ԱԳ նախարարն այս փաստաթուղթը անվանել է Իրանի միջուկային օբյեկտների դեմ սիոնիստական ռեժիմի թշնամական գործողությունների արդարացում և հիմք»,- նշված է Իրանի ԱԳՆ հաղորդագրությունում։
«Միջուկային օբյեկտների վրա հարձակումը անօրինական է և արգելված է միջազգային իրավունքով։ Միջազգային հանրությունը պարտավոր է պատասխանատվության ենթարկել սիոնիստական ռեժիմին այս վտանգավոր և աննախադեպ հանցագործության համար։ Իսրայելի թշնամական գործողությունները Վաշինգտոնի ուղղակի աջակցության հետևանք են, Իրանի և ԱՄՆ-ի միջև միջնորդավորված բանակցությունները շարունակելը մի իրավիճակում, երբ սիոնիստական ռեժիմը բարբարոսություն է իրականացնում, նպատակահարմար քայլ չէ»,- ըստ Իրանի ԱԳՆ հաղորդագրության, ընդգծել է Աբբաս Արաղչին։
