Օգոստոսի 27-ին Արագածոտնի մարզում կանխել են քաղաքացու առևանգումը, ում, ըստ տեղեկությունների, պետք է սպանեին, հաղորդում է Shamshyan.com–ը։
Այդ օրը ժամը 23:40-ի սահմաններում Ապարանում Պարեկային ծառայության կարգախումբը նկատել է Աշտարակ-Ապարան ավտոճանապարհին անկանոն երթևեկող «ՎԱԶ 2107» մակնիշի ավտոմեքենան։ Պարեկները կանգնեցրել են նշված ավտոմեքենան, երբ մոտեցել են, վարորդը փորձել է շարժիչը միացնել, որպեսզի դիմի փախուստի, սակայն պարեկներից մեկը կարողացել է կանխել նրա փախուստը՝ ձեռքը մտցնելով ավտոմեքենայի մեջ, անջատելով ավտոմեքենան ու հանելով բանալին։
Օգնության հասած գործընկերների օգնությամբ նշված ավտոմեքենան ու այնտեղ գտնվող անձինք տեղափոխվել են ոստիկանության Աշտարակի բաժին։
Կայքի տեղեկություններով վարորդը եղել է Արագածոտնի մարզի բնակիչ 44-ամյա Ֆրունզե Կ.-ն, իսկ ուղևորները եղել են Շիրակի մարզի բնակիչ 44-ամյա Միքայել Մ.-ն, Արմավիրի մարզի բնակիչ 35-ամյա Աննա Կ.-ն և Արարատի մարզի բնակիչ 44-ամյա Վարդան Ս.-ն։
Ըստ կայքի՝ նշված անձինք Միքայել Մ.-ին առևանգել են Աշտարակ քաղաքի Մուղնի թաղամասից և մտադրություն են ունեցել Միքայել Մ.-ի նկատմամբ հաշվեհարդար տեսնել, սակայն իրենց կամքից անկախ հանգամանքներում հանցագործությունը չեն կարողացել հասցնել ավարտին։
Ավտոմեքենայում նրանց հետ ևս մեկ հոգի է եղել, ում հաջողվել է դիմել փախուստի, իսկ Միքայել Մ.-ին առևանգել են, քանի որ նա գումարային պարտք ու պահանջի խնդիր է ունեցել առևանգողներից Ֆրունզե Կ.-ի հետ։
Դեպքի փաստով ոստիկանության Աշտարակի բաժնում «մարդու առևանգում» հատկանիշներով փաստաթղթեր են կազմվել, որոնք փոխանցվել են ՀՀ Քննչական կոմիտեի Արագածոտնի մարզային քննչական վարչություն՝ հետագա ընթացքը լուծելու համար։
Ոստիկանությունն ու քննչական բաժինը ձեռնարկում են անհրաժեշտ միջոցառումներ՝ փախուստի դիմած անձի ինքնությունը ճշտելու, նրան հայտնաբերելու ուղղությամբ։
