Ռազմական փորձագետ Վահագն Սարոյանի ֆեյսբուքյան գրառումը․ «Հայաստանում, մասնավորապես` Երևանում հրազենի գործադրմամբ հանցագործությունները գնալով ավելի հաճախակի են դառնում՝ տարբեր ելքերով։ Սա արդեն պարզապես առանձին դեպքերի շարք չէ, այլ հանրային անվտանգության լուրջ խնդիր իր բոլոր հետևանքներով:
Այստեղ մեկ այլ խնդիր էլ կա, օրինակ` ոստիկանությունն ինքն է փաստում, որ բնակչության շրջանում ապօրինի պահվող զենք-զինամթերքի հայտնաբերումն ու առգրավումը շարունակում է մնալ կարևոր խնդիր։
Այսինքն՝ խնդիրը միայն այն չէ, որ երբեմն Երևանում և այլ վայրերում կրակոցներ են հնչում։ Խնդիրն այն է, որ հասարակության մեջ շրջանառվում է մեծ քանակությամբ չգրանցված և ապօրինի զենք, որի ամբողջ ծավալը պետությունը, բնականաբար, չի հասցնում հայտնաբերել։
Հայաստանում հրազենային միջադեպերի պարբերականությունը պետք է ստիպի իշխանություններին ոչ թե հերթական դեպքից հետո միայն հաղորդագրություն տարածել, այլ իրական պատասխան տալ հարցին՝ Հայաստանում ապօրինի զենքի ինչպիսի՞ ծավալ կա, որտեղի՞ց է այն հայտնվում, ո՞վ է վերահսկում դրա շրջանառությունը, և ինչո՞ւ է քաղաքացիների ձեռքում շարունակում հայտնվել այնպիսի զինանոց, որը պետք է գտնվեր բացառապես պետության վերահսկողության ներքո։
Այսօր քաղաքացին արդարացի կերպով սկսում է մտածել, որ ցանկացած վեճ կարող է ավարտվել հրազենային կրակոցով, դա արդեն ոչ թե պարզապես հանցագործության վիճակագրության, այլ պետության անվտանգության համակարգի արդյունավետության մասին է խոսում»։
