Ամերիկյան զինվորականները մայիսին մտադիր էին ցամաքային գործողություն սկսել Իրանում, որպեսզի առգրավեին բարձր հարստացված ուրանի պաշարները: Սակայն ավելի ուշ ԱՄՆ-ն հրաժարվել է այդ պլանից՝ համարելով այն չափազանց վտանգավոր։ Այս մասին հայտնում է CNN հեռուստաալիքը՝ հղում անելով իրազեկ աղբյուրներին։
Այս ձախողված փորձից հետո Իրանն էլ ավելի է ուժեղացրել իր միջուկային օբյեկտների անվտանգությունը: Վերջին շաբաթներին իրանցիները մասնակիորեն փլուզել են թունելները և ականապատել այնտեղ տանող մուտքերը: Ըստ միջազգային փորձագետների՝ հենց այդտեղ է պահվում զենքի արտադրության համար պիտանի շուրջ կես տոննա ուրանը:
Այժմ այդ պաշարներին հասնելը դարձել է անհամեմատ բարդ, վտանգավոր ու երկարատև գործ: Աղբյուրները նշում են, որ Իրանի այս քայլերը լրացուցիչ խոչընդոտներ են ստեղծում ԱՄՆ-ի հետ հնարավոր համաձայնության համար: Ըստ այդ պայմանավորվածության՝ ուրանը պետք է հանձնվեր և ոչնչացվեր Վաշինգտոնի վերահսկողությամբ:
ԱՄՆ վարչակազմի բարձրաստիճան պաշտոնյաներից մեկը հայտարարել է, որ կողմերը «մոտ են գործարքին», որի շրջանակներում Իրանը պետք է հարստացված ուրանը հանձնի Միացյալ Նահանգներին։ Նրա խոսքով՝ դրանից հետո այդ նյութը կոչնչացվի և դուրս կբերվի երկրից։
Այդուհանդերձ, հնարավոր համաձայնագրի կոնկրետ պայմանները դեռևս վեճերի առարկա են, իսկ իրանական լրատվամիջոցների բացահայտումներն արդեն արժանացել են ԱՄՆ նախագահի կտրուկ արձագանքին:
Միջուկային անվտանգության փորձագետները զգուշացնում են, որ նույնիսկ հենց իրանցի մասնագետների համար ուրանի դուրսբերումն ու տեղափոխումն այժմ ծայրահեղ բարդացել է. դրա համար ծանր տեխնիկա և ականազերծման աշխատանքներ են անհրաժեշտ:
ԱՄՆ Միջուկային անվտանգության ազգային վարչության՝ միջուկային նյութերի հեռացման ծրագրի նախկին ղեկավար Սքոթ Ռեքերը նշել է, որ ստեղծված իրավիճակը կարող է դժվարացնել համաձայնագրի վավերացումը: Բացի այդ, ռիսկ կա, որ նյութի մի մասն անհասանելի կմնա միջազգային վերահսկողության համար:
Ըստ հաշվարկների՝ պաշարների հիմնական մասը կարող է լինել Սպահանի օբյեկտի փլուզված թունելներում, իսկ մնացածը՝ այլ միջուկային տարածքներում:
Աղբյուրները փաստում են՝ նույնիսկ եթե գործարքն ստորագրվի, միևնույն է, բարդ տեխնիկական բանակցությունների առանձին փուլ կպահանջվի: Կողմերը ստիպված կլինեն որոշել, թե ինչպես է միջազգային հսկողության ներքո իրականացվելու նյութի դուրսբերումը, ստուգումն ու տեղափոխումը:
