Հորմուզի նեղուցում երկու բեռնատար նավերի վրա ԱՄՆ-ի հարձակման հետևանքով առնվազն հինգ մարդ է զոհվել։ Այս մասին հայտնել է իրանական Tasnim գործակալությունը՝ հղում անելով ռազմական շրջանակների իր աղբյուրին։
Ըստ տեղեկությունների՝ քաղաքացիական բեռներ տեղափոխող նավերը Օմանի Խասաբ նավահանգստից ուղևորվում էին դեպի Իրանի ափեր։ Միջադեպի մասին հայտնի է դարձել այն լուրերի ստուգումից հետո, թե ԱՄՆ-ը խորտակել է մի քանի իրանական մոտորանավակներ։
Ավելի վաղ Associated Press գործակալությունը, հղում անելով ԱՄՆ Զինված ուժերի կենտրոնական հրամանատարության ղեկավար, ադմիրալ Բրեդ Կուպերին, տեղեկացրել էր, որ ամերիկյան ռազմական ուղղաթիռները Հորմուզի նեղուցում խորտակել են իրանական վեց փոքր մոտորանավակ։ Իրանը հերքել է այս պնդումները՝ հայտարարելով, որ մայիսի 4-ին Իրանի ռազմածովային ուժերի և ոչ մի լողամիջոց ԱՄՆ-ի կողմից չի խորտակվել։
