ԱՄՆ-ը շուրջ 7,5 մլն դոլար է հատկացրել հայկական ԶԼՄ-ների, լրագրողների և բլոգերների ֆինանսավորմանը։ Այդ մասին վկայում են ԱՄՆ կառավարության պետական ծախսերի վերաբերյալ տվյալները, որոնք ուսումնասիրել է «ՌԻԱ Նովոստի»-ն։

Սկզբում Վաշինգտոնը «Media Program in Armenia» ծրագրի համար նախատեսել էր 15 մլն դոլար։ Ծրագիրը մեկնարկել էր 2023 թվականին և նախատեսված էր մինչև 2028 թվականը, սակայն մեկնարկից երկու տարի անց դադարեցվել է։

Միջոցները տրամադրվել են միջազգային ոչ առևտրային «Internews» կազմակերպության միջոցով։

«ՌԻԱ Նովոստի»-ի ուսումնասիրած փաստաթղթերի համաձայն՝ 2024 թվականի դեկտեմբերին ծրագրի շրջանակում աջակցություն էր ստացել հայկական 59 լրատվամիջոց, վերապատրաստում էր անցել մեդիա ոլորտի 338 ներկայացուցիչ, իսկ լրագրողներն ու բլոգերները ծրագրի աջակցությամբ հրապարակել էին 805 նյութ։

ԱՄՆ նախագահ Դոնալդ Թրամփի՝ Սպիտակ տուն վերադառնալուց հետո նոր վարչակազմը սկսել է արտասահմանյան օգնության, այդ թվում՝ ԱՄՆ Միջազգային զարգացման գործակալության (USAID) ծրագրերի լայնածավալ վերանայում։

Այդ վերանայման շրջանակում 2025 թվականի մարտի 1-ին դադարեցվել է «Internews»-ի դրամաշնորհի ֆինանսավորումը, որն ուղղված էր Հայաստանում մեդիա ծրագրի իրականացմանը։

Մոսկվան նախկինում քննադատել է USAID-ի գործունեությունը Հայաստանում։ 2025 թվականի մայիսին, մեկնաբանելով Երևանում տեղի ունեցած ակցիան, ՌԴ ԱԳՆ պաշտոնական ներկայացուցիչ Մարիա Զախարովան ենթադրել էր, որ նման նախագծերի վրա կարող էին շարունակվել նախկինում USAID-ի կողմից հատկացված միջոցների ծախսերը։ Նա նաև հայտարարել էր ռուս-հայկական հարաբերությունները խաթարելու փորձերի մասին։