«Հրապարակ» թերթը գրում է. «Հոկտեմբերի 25-ին կայանալիք Մեղրիի ՏԻՄ ընտրություններում, ինչպես տեղեկացրել ենք, իշխանական թեկնածուն գրեթե առանց մրցակցության է մնացել։ Առաջադրվել են թեկնածուներ Շնորհապետական, Եվրոպական, «Ապրելու երկիր» կուսակցություններից, բայց բոլոր թեկնածուները, ըստ մեր աղբյուրի, կապեր ունեն իշխանականների հետ։
Սակայն ՔՊ-ն, այնուամենայնիվ, «ստրախովկայով» է գործում՝ 2 օր առաջ «Ապրելու երկրի» համայնքապետի թեկնածու Արմեն Հայրապետյանին կանչել են Հակակոռուպցիոն կոմիտե, մեր տեղեկություններով՝ Մեղրիի կալանավորված համայնքապետ Խաչատուր Անդրեասյանի գործով։ Վերջինիս մեղադրում են «առանց թույլտվության ընդերքը կամ բնական պաշարներն օգտագործելու, ինչպես նաեւ՝ այդ նպատակով կաշառք տալու եւ ստանալու մեջ»։
Արմեն Հայրապետյանն ավագանու նիստում կողմ է քվեարկել այդ հանքը շահագործելու որոշմանը։ Նա մտերիմ է Անդրեասյանի հետ եւ նրա ջանքերով է սեփականաշնորհել Մեղրիի կոմունալ տնտեսության շենքի մի մասը, որի մի մասն էլ տարիներ առաջ գնել է նրա հայրը՝ կոմունալի նախկին պետը։ Այդ ժամանակ Մեղրիի քաղաքապետը նրանց ազգական Սերգեյ Հայրապետյանն էր։ Այդ սեփականաշնորհումը ժամանակին մեծ աղմուկ բարձրացրեց Մեղրիում, բայց մնաց անհետեւանք։
Ներկայում կոմունալի շենքը պատկանում է Հայրապետյանների ընտանիքին՝ ծառայում է որպես հյուրանոց։ Ի դեպ, թեկնածուն խոստանում է լողավազան կառուցել, զբոսայգիները բարեկարգել, բայց մեղրեցիները թերահավատ են, որ Հայրապետյանը կանցնի, ասում են՝ նախորդ անգամ անցավ Ռուբեն Վարդանյանի շնորհիվ, այժմ շանս չունի։
Առավել մանրամասն թերթի այսօրվա համարում
