«Բռնի տեղահանումը, բնականաբար, մարդասիրական, իրավական, սոցիալական, տնտեսական, մշակութային, հոգեբանական բազմաթիվ ու բազմաշերտ խնդիրներ առաջացրեց։ Խնդիրներ, որոնց այս երեք տարիների ընթացքում Հայաստանի Հանրապետության կառավարության, հասարակական և բարեգործական տարբեր կազմակերպությունների, անհատների կողմից փորձ է արվում երկարաժամկետ կամ կարճաժամկետ ծրագրերի միջոցով լուծումներ տալ։

Խնդիրների շրջանակը շատ մեծ է։ Դրանք, ինչպես ասացի, ծրագրեր են, որոնք փորձում են գոնե նվազագույն կարիքները բավարարել, ապահովել սոցիալական կայունություն։ Դրանք վերաբերում են թե՛ բնակարանային խնդրին, թե՛ քաղաքացիությանը, թե՛ մշակութային և կրթական խնդիրներին։ Այսինքն՝ առկա է խնդիրների մի մեծ խումբ, որոնք այսօր էլ, հակառակ որդեգրված ծրագրերին ու քաղաքականությանը, այնուամենայնիվ շարունակում են մնալ որպես մարտահրավերներ և շարունակական արժևորման ու գնահատման կարիք ունեն։

Ասել, թե անցնող երեք տարիների ընթացքում կամ գոնե վերջին երկու տարիներին այդ խնդիրները արժևորման, վերլուծության կամ գնահատման չեն ենթարկվել, բնականաբար, ճիշտ չի լինի։ Բայց, ինչպես քիչ առաջ նշեցի, դրանք այնքան լուրջ, խորքային և համատարած խնդիրներ են, որ, կարծում եմ՝ ամենօրյա ուշադրության և լուծման անհրաժեշտություն ունեն»,- այս մասին այսօր՝ սեպտեմբերի 23-ին, հայտարարեց ԱԺ «Հայաստան» խմբակցության պատգամավոր Լիլիթ Գալստյանը։

Մանրամասն՝ տեսանյութում։