Ռազմական փորձագետ Վահագն Սարոյանի ֆեյսբուքյան գրառումը․ «Այս իշխանությունը տարիներ շարունակ հասարակությանը ներկայացնում է «խաղաղության օրակարգ», բայց որքան էլ փորձեն դա ներկայացնել որպես կայունության ու անվտանգության երաշխիք՝ տարածաշրջանի իրականությունը դրան չի համապատասխանում: Եվ որևէ մեկը չի կարող երաշխավորել, որ տարածաշրջանային այդ անկայունությունը վաղը չի վերածվի ռազմական գործողությունների` կլանելով նաև մեզ:
Ու հենց այս պայմաններում մեզ ասում են՝ բանակը պետք է լինի ոչ թե մարտունակ, այլ «պաշտպանունակ»։ Հայկական բանակը մարտունակ էր և պաշտպանունակ էր։ Ու եթե այն պետք էր բարեփոխել, զինել, վերակազմավորել ու կատարելագործել, ապա պետք էր դա անել՝ ավելացնելով կարողությունները: Իսկ ի՞նչ բանակ է կառուցում այս իշխանությունը` խաղաղությա՞ն, թե՞ խնդրաշատ…
Ավելի ճիշտ` ոչ թե ինչ անուն է տալու այդ բանակին՝ «մարտունակ», «պաշտպանունակ», «փոքր», «պրոֆեսիոնալ» կամ որևէ այլ բառով… այլ հստակ` ո՞րն է այդ նոր բանակի ամբողջական արդյունավետ մոդելը, և ինչպե՞ս է այն պաշտպանելու Հայաստանը այն դեպքում, երբ «խաղաղության դարաշրջանը» հանկարծ ավարտվի։
Որովհետև պետության անվտանգությունը չի կարելի կառուցել այն ենթադրության վրա, որ պատերազմ չի լինելու։
Խաղաղությունը, ի վերջո, ցանկություն է, ոչ թե դարշրջան»։
