«Այն, ինչ հիմա կատարվում է Հայաստանի Հանրապետությունում, կարող ենք ասել, որ պատմական ժամանակաշրջան ենք ապրում։ Սկսած պարոն Ծառուկյանի ձերբակալությունից, երբ երկրի վարչապետի պաշտոնը զբաղեցնող անձը նախապես հստակ ազդակ տվեց, որ նրան պետք է ձերբակալեն՝ իր իսկ բառերը չկրկնելով։ Այնուհետև՝ երբ մտան պարոն Ծառուկյանի տուն։ Այդ կադրերը, կարծում եմ, բոլորս ենք տեսել։ Վստահ եմ, որ այդ կադրերն արված էին ինչ-որ շատ փոքր լսարանի և ինչ-որ մեկի անձնական քմահաճույքները բավարարելու համար։
Ես, որպես իրավաբան և փաստաբան, ցանկացած պարագայում կարող եմ ընդունելի համարել անձին նույնիսկ ուժի կիրառմամբ ձերբակալելը, ընդհուպ մինչև գետնին պառկեցնելը։ Բայց այդ դեպքում պետք է հաշվի առնել մի քանի կարևոր հանգամանք։
Նախ՝ ինչ հանցագործության մեջ է անձը մեղադրվում։ Երկրորդ, և ամենակարևոր հանգամանքը, որը իրավապահ մարմինները պարտավոր են հաշվի առնել, այն է՝ արդյո՞ք անձը դիմադրություն է ցույց տալիս, արդյո՞ք փախուստի փորձ է անում կամ որևէ այլ հակազդեցություն է ցուցաբերում։
Այդպիսի պայմաններում իրավապահների գործողությունները կարող են իրավաչափ համարվել։
Սակայն այստեղ մենք տեսնում ենք, որ 70 տարեկան մարդը, բարերար, գործարար, իր տան ներսում, միայնակ կանգնած, նման կերպով է ձերբակալվում։ Դա, անկեղծ ասած, նույնիսկ ծիծաղելի չէ, այլ աբսուրդի աստիճանի է հասնում»,- այս մասին այսօր՝ հուլիսի 24-ին, ՔԿ-ի դիմաց լրագրողների հետ զրույցում նշեց նորընտիր ԱԺ պատգամավոր Ռուբեն Մխիթարյանը։
Մանրամասն՝ տեսանյութում։
