ԱՄՆ փոխնախագահ Ջեյ Դի Վենսը մեղադրել է Իսրայելի կառավարության որոշ անդամների՝ Իրանի հետ պատերազմը երկարաձգելու նպատակով ամերիկյան հասարակական կարծիքի վրա ազդելու փորձերի մեջ։ Գրում է BBC-ն:

Չորեքշաբթի օրը հայտնի պահպանողական փոդքասթեր Ջո Ռոգանին տված հարցազրույցում Վենսը նշել է, որ վստահում է որոշ իսրայելցի քաղաքական գործիչների, սակայն մյուսները «մանիպուլացնում են և փորձում են փոխել ամերիկյան հասարակական կարծիքը, որպեսզի պատերազմը շարունակվի անորոշ ժամանակով»։

«Ես միանշանակ կարծում եմ, որ մենք ականատես ենք եղել չափազանց լավ ֆինանսավորվող և շատ աննկատ արշավի, որի նպատակն էր խափանել բանակցությունները և տապալել համաձայնագիրը», — ընդգծել է փոխնախագահը։ Նրա խոսքով՝ կան «հստակ ապացույցներ», որ իսրայելցի որոշ առաջնորդներ «ատում են» նախագահ Դոնալդ Թրամփի և Իրանի միջև կնքված համաձայնագիրը։

Իսրայելի կառավարությունը դեռևս չի մեկնաբանել Վենսի հայտարարությունները։

Հունիսին ԱՄՆ-ն և Իրանը ստորագրել էին փոխըմբռնման հուշագիր, որը նախատեսում էր ԱՄՆ-ի կողմից զգալի զիջումներ, Հորմուզի նեղուցի ապաշրջափակում և վերջնական կարգավորման շուրջ բանակցություններ։ Իսրայելը հուշագրի կողմ չէր, թեև ԱՄՆ-ի կողմից մասնակցել էր Իրանի դեմ պատերազմին։ Հուշագրով նաև նախատեսվում էր, որ Իսրայելը պետք է դադարեցնի ռազմական գործողությունները Լիբանանում գործող «Հեզբոլլահ» շարժման դեմ։

Վերջին օրերին փխրուն հրադադարը փաստացի դադարել է պահպանվել․ Իրանը կրկին հայտարարել է Հորմուզի նեղուցը փակելու մասին, իսկ ԱՄՆ-ն հարվածներ է հասցրել Իրանի տարածքին։

Սպիտակ տան մամուլի քարտուղար Քերոլայն Լևիթը, մեկնաբանելով Վենսի հայտարարությունները, ասել է. «Կարծում եմ՝ նախագահը կհամաձայնի, որ, այո, օտարերկրյա պետությունները փորձում են ազդել ամերիկյան հասարակական կարծիքի վրա»։

Վենսը, որը ակտիվորեն մասնակցել է Իրանի հետ բանակցություններին, առաջին անգամ չէ, որ քննադատում է Իսրայելին։ Հունիսին, պատասխանելով Իրանի հետ հրադադարը քննադատած իսրայելցի քաղաքական գործիչներին, նա նշել էր, որ նրանց «չի արժե հարձակվել միակ հզոր դաշնակցի վրա, որը դեռևս մնացել է իրենց աշխարհում»։