Սահմանադրական դատարանի դատավոր Էդգար Շաթիրյանը 2026 թվականի փետրվարի 19-ին Կոռուպցիայի կանխարգելման հանձնաժողով է ներկայացրել 2025 թվականի գույքի, եկամուտների, ծախսերի և շահերի տարեկան հայտարարագիրը, այս մասին գրում է 24News-ը։
Նա հայտարարագրել է 2 բնակարան Երևանում՝ միանձնյա սեփականության իրավունքով, որից մեկը ձեռք է բերել հաշվետու տարվա ընթացքում։
Նա 1,158,333 դրամ փոխառություն է վերցրել «4Ա ԿԱՊԻՏԱԼ» ՍՊԸ-ից։ Տվյալ տարվա վերջում առկա փոխառության գումարը 0 դրամ է։ «4Ա ԿԱՊԻՏԱԼ» ՍՊԸ-ն գրանցված է 2021 թվականի հունիսի 30-ին, գործում է ԵՐԵՎԱՆ քաղաքում: Ընկերությունը զբաղվում է շինարարության և շինարարական գործունեության ոլորտում:
ՍԴ դատավորը 47,724,000 դրամ փոխառություն է վերցրել Արմեն Հովոյանից։ Նրանց միջև առկա կապի մասին տեղեկատվություն չկա։ Տվյալ տարվա վերջում առկա փոխառության գումարը 0 դրամ է։ Նա 35,510,400 դրամ փոխառություն է վերցրել նաև «ԴԻՍՔԱՎԵՐԻ» ԲԲԸ («ՄԼԼ ՄՈԹՈՐՍ» ՍՊԸ)-ից, որը կառուցապատող է։ Տվյալ տարվա վերջում առկա փոխառության գումարը 35,510,400 դրամ է։
Հաշվետու տարվա սկզբում Էդգար Շաթիրյանը բանկային հաշիվներից մեկում ունեցել է 0 դրամ, որը տարվա վերջում կազմել է 34,911 դրամ։ Մեկ այլ բանկային հաշվում ունեցել է 270,388 դրամ, տարվա վերջում մնացել է 4,551 դրամ։ Մեկ այլ հաշվում տարվա սկզբում եղել է 8,018,126, հաշվետու տարվա ավարտին կազմել է 8,908,269 դրամ։ Դատավորը տարվա սկզբում էլեկտրոնային հաշիվներից մեկում ունեցել է 1,376 դրամ, տարվա վերջում մնացել է 0 դրամ։ Հաշվետու տարվա սկզբում նա ունցել է 200․000 հազար դրամ կանխիկ գումար, տարվա ավարտին ունեցել է 220,000 դրամ։
Էդգար Շաթիրյանը 2025 թվականին եկամուտ է ստացել 4 աղբյուրից։ «Հայաստանի եվրոպական համալսարան» հիմնադրամից նա ստացել է 72,750 դրամ, որպես քաղաքացիաիրավական այլ պայմանագրերից ստացված եկամուտ։ ՍԴ-ից որպես աշխատավարձ ստացել է 18,667,193 դրամ։ 80,110 դրամ էլ ստացել է «Հայաստանի Հանրապետության պետական կառավարման ակադեմիայից, որպես քաղաքացիաիրավական այլ պայմանագրերից ստացված եկամուտ։ Շաթիրյանը Ֆինանսների նախարարությունից ստացել է 3,128,889 դրամ։ Ընդհանուր առմամբ հաշվետու տարվա ընթացքում ստացել է 21,948,942 դրամ։ Բանկերից մեկից որպես վարկ ստացել է 24,771,211 դրամ։ Հաշվետու տարվա ընթացքում 3,478,673 դրամ ուղղել է վարկի մարմանը։ Այլ միանվագ ծախսեր բաժնում 3,500,000 դրամ է նշել, սակայն ծախսի բովանդակության մասին տեղեկատվությունը նշված չէ։
Էդգար Շաթիրյանի հայրը՝ Էդուարդ Շաթիրյանը, ով բնակվում է որդու հետ, հայտարարագրել է 3 տրանսպորտային միջոց։ 2017 թվականի արտադրության TESLA, որը ձեռք է բերել 2021 թվականին, 1995 թվականի արտադրության BMW, որը գնել է 2004 թվականին։ Նա նաև հայտարարագրել է 2025 թվականի արտադրության BYD մակնիշի ավտոմեքենա, որը 3-րդ անձի սեփականությունն է, բայց շահագործվում է իր կողմից։ ՍԴ դատավորի հայրը հաշվետու տարվա սկզբում բանկային հաշվում ունեցել է 5,500 դրամ, տարվա վրջում այն կազմել է 144 դրամ։ Տարվա վերջում ունեցել է 22 հազար դրամ կանխիկ գումար։ Նրա եկամտի աղբյոևրը եղել է կենսաթոշակը, հաշվետու տարվա եկամուտը կազմել է 513,720 դրամ։
Հիշեցնենք, որ ՍԴ-ն քննում է 7 քաղաքական ուժերի կողմից ներկայացված դիմումները, որոնցով վիճարկվում է հունիսի 7-ին կայացած ԱԺ ընտրությունների արդյունքները, զեկուցող դատավոր է նշանակվել Էդգար Շաթիրյանը։
Նա 2020 թվականի սեպտեմբերի 15-ին Ազգային ժողովի կողմից ընտրվել է Սահմանադրական դատարանի դատավոր։ 2025 թվականի դեկտեմբերի 5-ին Սահմանադրական դատարանի կողմից ընտրվել է ՍԴ փոխնախագահ:
