«Մենք այստեղ կանգնած ենք այս ճակատագրական փուլում մի թիմով, ում գործունեությունը ձեր աչքի առջև է եղել անցնող տարիներին։ Սևանում ենք, հատկապես ուզում եմ նշել Իշխան Սաղաթելյանի իրականացրած գործունեությունը։ Դուք բոլորդ տեսել եք, որ այն ժամանակ, երբ շատերը խուսափել են պատասխանատվությունից, Իշխան Սաղաթելյանը, մեր ամբողջ քաղաքական թիմը, չի վարանել, չի կասկածել, գնացել է պայքարի, պայքարել է, և հիմա մեր պայքարի ամենակարևոր հանգրվաններից մեկն է, և մենք միասին փոխելու ենք այդ իրավիճակը։
Ես ուզում եմ, որ իսկապես մենք ոգով ամրանանք առաջիկա օրերի համար, որովհետև մենք պետք է վռնդենք մեզ պատերազմ բերածներին, պարտություն բերածներին, մեր երկրի ներսում թշնամանք արմատացրածներին, Հայաստանը սփյուռքից կտրածներին, մարդկանց, ովքեր խաղամոլությունն ու թմրամոլությունը դարձրել են այսօրվա Հայաստանի բրենդը։
Սա այն իրավիճակն է, որ մենք միասնաբար փոխելու ենք, որովհետև անհնար է ապրել Հայաստանում այն ատելությամբ, այն պառակտվածությամբ, որ հիմա կա՝ ունենալով իրական թշնամիներ մեր երկրի սահմաններից դուրս։ Անթույլատրելի է թշնամության այն մթնոլորտը, որ հիմա կա»,- այս մասին այսօր՝ հունիսի 4-ին, Սևանում հայտարարեց ԱԺ «Հայաստան» խմբակցության պատգամավոր Աննա Գրիգորյանը։
Մանրամասն՝ տեսանյութում։
