Ավելի վաղ տեղեկացա, որ Հակակոռուպցիոն կոմիտեն խուզարկություններ է իրականացրել «Հայաստան» դաշինքի նախընտրական շտաբներում, մասնավորապես՝ Աշտարակում։ Խուզարկություն է կատարվել նաև Դաշնակցության Գերագույն մարմնի նախագահ, Ազգային ժողովի պատգամավոր Աշոտ Սիմոնյանի բնակարանում։
Ընդամենը պետք է արձանագրել, որ այս իշխանությունը նման քայլերով և մեթոդներով փորձում է սահմանափակել և կազմալուծել ընդդիմադիր քաղաքական ուժերի նախընտրական շտաբների գործունեությունը։ Այն փորձում է ազդեցություն գործել մեր աջակիցների, համակիրների և ընտրողների վրա, սակայն դա չի հաջողվելու։
Նիկոլ Փաշինյան, դու և քեզ սպասարկող իրավական համակարգը վաղուց արդեն կանխատեսելի եք դարձել, և նման ճղճիմ քայլերով ու մեթոդներով որևէ արդյունքի չեք հասնելու։
Երկրորդ կարևոր արձանագրումն այն է, որ ակնհայտորեն այս իշխանությունը գիտակցում է իշխանությունը կորցնելու վտանգը, և դրա գործողությունները պայմանավորված են հենց այդ վախերով։
Կոչ եմ անում միջազգային դիտորդներին ուշադրություն դարձնել տեղի ունեցող գործընթացներին, տեսնել դրանք և տալ համապատասխան գնահատականներ։ Հակառակ դեպքում այսքան երկար ժամանակ կույր ձևանալն այլևս պարզապես անհնար է։
Մեր համակիրներին, աջակիցներին, ընտրողներին և առհասարակ մեր ժողովրդին վստահեցնում եմ, որ նման մեթոդներով այս իշխանությունը չի կարող վերարտադրվել։ Նրա միակ հույսը մնացել է ուժային կառույցների միջոցով, նման ապօրինի մեթոդներով, խոչընդոտել մեր շտաբների գործունեությունը, սակայն դա նույնպես արդյունք չի տալու։
Մեր ընկերներին և համակիրներին կոչ եմ անում շարունակել իրենց աշխատանքը, չշեղվել և ուշադրություն չդարձնել այս գործողություններին։ Ընդամենը չորս-հինգ օրից այս իշխանության ավարտը լինելու է։
