Հունիսի 7-ի ընտրություններին ընդառաջ բազմաթիվ սփյուռքահայեր և արտերկրում բնակվող մեր հայրենակիցներ պատրաստվում են այցելել Հայաստան՝ մասնակցելու ընտրություններին և կատարելու իրենց քաղաքացիական պարտքը։
Սակայն սահմանը հատող քաղաքացիներին բաժանվում են թերթիկներ, որոնց բովանդակությունը ոչ թե ողջույնի խոսք է կամ ընտրություններին մասնակցությունը խրախուսող ուղերձ, այլ՝ տարբեր նախազգուշացումների, պատասխանատվության և հնարավոր խախտումների մասին հիշեցումներ։
Ավելին՝ շատ քաղաքացիներ նշում են, որ Հայաստան մուտք գործելուց և ռոումինգ ծառայությանը միանալուց անմիջապես հետո ստանում են նույնաբովանդակ SMS հաղորդագրություն։ Ստացվում է, որ հայրենիք վերադարձող մարդուն սահմանին դիմավորում է նախազգուշացնող թերթիկը, իսկ հեռախոսը միացնելուն պես՝ նույն բովանդակությամբ հաղորդագրությունը։
Բնական հարց է առաջանում՝ արդյո՞ք ավելի տրամաբանական չէր լինի, որ հայրենիք ժամանող հայերը նախ ստանային «Բարի գալուստ Հայաստան» ուղերձը, տեղեկանային ընտրություններին մասնակցելու հնարավորության մասին, իսկ իրավական բնույթի տեղեկատվությունը ներկայացվեր որպես լրացուցիչ տեղեկանք։
Սփյուռքը Հայաստանի կարևորագույն հենարաններից մեկն է։ Հետևաբար պետական յուրաքանչյուր քայլ պետք է նպաստի նրա ներգրավվածությանն ու վստահության ամրապնդմանը։
Եվ, թերևս, ամենաուշագրավն այն է, որ նման մոտեցումն ավելի շատ խոսում է իշխանության մտահոգությունների մասին, քան սեփական դիրքերի նկատմամբ վստահության։ Վստահ իշխանությունը քաղաքացիներին հրավիրում և ոգևորում է, անվստահ իշխանությունը՝ նախազգուշացնում և սպառնում։
Իսկ երբ սահմանին բաժանվող թերթիկին հաջորդում է նույնաբովանդակ SMS հաղորդագրությունը, ակամա տպավորություն է ստեղծվում, որ պետությունն ու իշխանությունն ավելի շուտ կցանկանային, որ որևէ մեկը չգար էլ, հակառակ դեպքում կողջունեին և ընտրություններին մասնակցելու կոչ կանեին։
